3221/2024-2025

Dated Aizawl, the 27th November, 2024: Vawiin khan Chief Minister Pu Lalduhoma chuan a office-ah Rajesh Nambiar, Executive Director & Sales Head, Indian Oil AOD, State Office, Indian Oil Corporation chu a kawm a. Mizoram oil depot hmalak mek a sawipui.

Chief Minister hian, "Oil depot neih thuai kan duh a, a hmun thlan tur pahnih kan chhawp che u hi tlang fel rang ula, hnathawh theih hun (working season) a intan tawh avangin hna tan thuai ula kan duh a ni", tiin Oil Depot atana an thlen chin a sawipui.

Pu Rajesh Nambiar hian, document kan neih zawng kan headquarters lamah kan thehlut tawh a, zawhna tlema zawng min rawn zawt leh mek. Reiloteah kan thlan fel mai ka ring tawh a. Kan thlan fel chuan kum hnih chhunga kan sak zawh mai theih ka beisei, a ti. Oil Depot lama an hmalakna bakah Mualkhang Bottling Plant thar-thawh tura an hmalakna hrang hrang te, Electrict Vehicle a lo pun zel avanga charging station engemawzat siam tura hma an lak mek te, Indian Oil Corporation in CSR hmanga Mizorama hna an thawh te pawh Chief Minister hnenah hian an hrilh a. CSR hmalaknaah hian hmachhawp pawh kan la nei nual a ni, a ti.

IOC hian Mizoramah petrol pump 72 an nei mek a, electric charging station 20 siam tumin hma an la mek bawk. Mualkhang Bottling Station site development an thawk tan a, tunah pawh a hungna tur tender an tichhuak mek. Local contractor ten an hna hi ngaihven ve se an duh thu pawh an tarlang a ni.