2402/2024-2025

Dated Aizawl, the 5th October, 2024: Kumin January ni 4 a Chief Minister Pu Lalduhoma leh Ministry of Civil Aviation thuneitu sang, Secretary Pu V. Vualnam leh Pu Vanlaldina Fanai, khatih laia Chief Financial Controller, te Delhi-a an inkawmnaa an ruahman angin, vawiin khan Lengpui Thlawhna Tumhmunah Chief Minister Pu Lalduhoma chuan IndiGo thlawhna Delhi leh Aizawl inkara thlawk thin a leta tihpun (doubling of flights) thar chu a hawng.

A hawnna inkhawm tawiah hian Chief Minister chuan, kan mamawhna min hriatpuia hetiang kan neih theih nana hma min laksaktu Ministry of Civil Aviation, Govt. of India leh IndiGo Airlines te chungah lawmthu ka sawi a. Hei hian India ram laili leh Mizoram chu inpawh nasa lehzualin min siam dawn a. Officials chet velna atan te, sumdawngten hma thar an lakna atan te, phai lam pan ngai damlo tan te, leh zirlaite tan te a tangkai em em dawn a. Tin, kan ram mawi tak hi tlawhpawh awl lehzualin min siamsak a, khualzin tan tlawh pawh kan awlsam lehzual dawn a ni, a ti. Mizoram sawrkarin civil aviation hmasawnna lamah hma a la chho zel dawn tih tarlangin, Lengpui Tumhmun a tul anga tuaihnum chhoh zel a nih tur thu te, Mizoram hmun thenkhata Heliports din a nih tur thu te a sawi bawk.

Chief Minister hian Thlawhna thlawk belh hmasa ber tur lawmna cake a zai a, a chuang tur passenger thlan chhuah pakhat hnenah Boarding Pass a hlan a, Thlawhna thlawk chhuak tur hi a vai liam bawk.

IndiGo hian kar khata thlawhna vawi 5 an lo thlawhtir thin chu vawi 10 ah an tipung dawn a. Nitina thlawk a awm bakah Nilaini, Zirtawpni leh Pathianniah vawi hnih thlawk a awm dawn a ni.

Hetianga IndiGo in a thlawh zat a leta an tihpun chhan hi kumtir lama Chief Minister in Ministry of Civil Aviation hotute hnena Delhi Mizoram House a an inkawmnaah, Aizawl Thlawhna ticket man to lutuk tihtlawm nana Thlawhna tam zawk thlawhtir a rawtna tihhlawhtlinna a ni.

A hawnna inkhawmah hian Pu R K Singh, IAS (Rtd), Special Director, IndiGo pawhin thusawiin, he kan hmalakna hian India ram laili leh Mizote inkarah inunauna tha zawk, inpawhna nghet zawk a siam kan beisei a. Mizoram sawrkar hmalaknaah kan lawm hle a ni. Mizoramin thlai thar hralh tur a neih, Thlawhnaa phurh chhuah theih dan tur pawh kan lo dap ang a. A hranin ruahmanna duan kan lo tum ang, a ti.

He hunah hian Pu Richard Vanlalhmangaiha, MP, Pu H. Lalzirliana, MLA, Dr. Renu Sharma, Chief Secretary, Pu Vanlaldina Fanai, Commissioner & Secretary to Chief Minister bakah Civil Aviation official pawimawh te, IndiGo Airlines thuneitute an tel a ni.