Ni 4 chhung (16 - 20 Aug 2011) awh tur Mizoram Civil Service Sports & Culture Association (MCSSCA) buatsaih 24th Inter Departmental Sports 2011 chu vawiin khan Chief Minister Pu Lal Thanhawla’n Vanapa Hall-ah a hawng.

Hawnna thuchah a sawiah Chief Minister chuan sorkar department hrang hrang ten games hmanga intihsiakna an neih tur hian inhmelhriatna te, inhriatthiamna leh thawhhona tha zawkte a siam ngei a beisei thu sawiin, mahni chakai ngawr ngawr khawrh tum lova; midangte awmdan leh kan hnathawh theuhte inhriattawnna hunah hmang thei se a duhthu a sawi a.Sports hi mihring nun khalh ngiltu leh insum theihna min siam sak thei tu anih avangin central sorkar pawhin inter ministry sports a buatsaih thin thu a sawi a. Taksa hrisel leh ngaihtuahna fim nei turin hunawl kan neihte insawizawi nan hmang thin turin a chah a. Sorkar hnathawkte chu an hnathawh dan kalphungte, hun vawn dikahte, work ethics leh mahni inthununna kawngah te insiam that tur an nei a ni tiin, mi hman tlak ni turin sportsman spirit hi kan nun vawngtu ah hmang theuh turin a chah a ni.

MCSSCA hi All India Civil Service Sports Association hnuaiah kum 1988 khan din tan a ni a. AICSSA hi Personnel & Administrative Reforms Ministry kaihhruaina hnuaia awm a ni a, MCSSCA hi chu Sports & Youth Services kaihhruai (Nodal Deptt) a ni. Intihsiakna hi games hrang hrang 4- Badminton, Table Tennis, Chess leh Carrom ah te inelna neih a ni dawn a. Badminton hi Govt Mizo HSS Hall-ah category 7 ah khelin department 24 an tel a, Table Tennis hi category 5 ah thenin Kulikawn Indoor Stadium ah department 22 ten an  khel ang a, Chess hi department 20 in category 3 ah MPRO Hall-ah an inkhelh bawk anga, Carrom hi category 4 ah inkhelin department 21 in Babutlang Archive Hall-ah an inkhel bawk ang.

Inkhel turte aiawh hian Nl. Lalrinpuii, PWD carrom players kaihhruaina hnuaiah department hrang hrang Team Manager ten thu an tiam a ni.

Inkhawm hi Pu Zoliana Royte, Chairman, Inter Department Sports Meet 2011 in a kaihruai a ni.

Attachment

  • Loading attachment...