958/2024-2025

Dated Aizawl, the 26th June, 2024: International Day Against Drug Abuse & Illicit Trafficking, 2024 chu vawiin khan Vanapa Hall ah hman a ni a. Pu Lalduhoma, Chief Minister chuan he hun hi hmanpuiin; Mizoram mipui zawng zawngte chu ruihhlo leh dan lova ruihhlo phurh dona hna thawhpuiah a sawm.

Thu a sawinaah Chief Minister chuan, kan chhak lam ram thenkhatte khi khawvel hriata ruihhlo bupui, Golden Triangle an tih thin an ni a, chuta tanga ruihhlo lo chhuk thlakna kawngpuiah chuan kan awm avangin hun rei tak ruihhlo hian min chim buai tawh. Keinin thapui thawhin lo do mah ila kan thenawm ramten an beih ve si loh avangin kan mal tan a, a sawt mawh hle. Supply a tam avangin a man a tlawm a, kan thalai tam takten a ngawl an lo vei phah a. Sawrkarna kan chan ve leh a theih ang angin beihpui kan thlak nghal a ni. Miti huapa do ngai anih avangin kohhran hrang hrang leh tlawmngaipawlte, kan ram mipui zawng zawng te hi thawhpuiah kan sawm a ni, a ti.

Hun rei tak reh tawh State Level Ruihhlo Do Core Committee kan tinung thar a. Supply Reduction mawhphurhna hi Excise & Narcotics kutah dahin Demand Reduction hi Social Welfare & Tribal Affairs kutah dah a ni. Kan tlawmngaipawl hrang hrang te inpekna pawh a ropui hle, an chungah lawmthu ka sawi a ni. Tin, central sawrkar hnuaia hmalakna peng hrang hrang Narco Co-ordination Center (NCORD) te, Anti-Narcotics Task Force (ANTF) te, Nasha Mukt Bharat Abiyaan (NMBA) te pawh tha takin kan kalpui reng bawk.

Kan fate drug laka an him theih nan hian chhungkua kan pawimawh hle a, nu leh paten kan fate thlithlai taima ila, nun kawng dik an zawhna tur a nih phawt chuan khauh taka khuahkhirh hi i hreh lovang u. Chu chu Pathian pawhin a phal a ni, a ti.

Khualzahawm Pi Lalrinpuii, Health Minister pawhin; kawng dangah nasa takin hma sawn mah ila a hmang tangkaitu tur mipuite, a bikin kan thangthar te ruihhlovin min tihchhiatsak zel chuan a pawi dawn lutuk a. Hei hian ka rilru a luah nasa thin a ni, a ti a. Ngawlvei te enkawlna lama Social Welfare & Tribal Affairs department hmalakna hrang hrang te a tarlang bawk.

Pu Lalnghinglova Hmar, Minister, Excise & Narcotics pawhin, ruihhlo dona lamah sawrkar hian mipuite duh khawp kan la phak chiah lo a nih pawhin kan theihtawp kan chhuah, kan bei zel dawn. Ruihhlo hian min chim nasat avangin kil thum atangin sawrkar, tlawmngaipawl leh kohhran ten thapui thawha kan do a ngai niin ka hria. Covid hripuiin min chimbuai vanglai, sawrkar pawh a chet hleih theih tawh loh hnua kohhran te hmalakna ropui tak tak ang kha ruihhlo do thuah pawh hmu leh thei ila tiin duhthu ka lo sam fo thin, tiin ruihhlo dona kawnga tanrual a tul thu a tarlang a. LESDE hmalakna hnuaia ruihhlo ngaite enkawl leh an eizawnna khawp thiamna an neih theih nana hmalak an tum dan te a tarlang.

Prof. Lalnuntluanga, Vice President Central YMA pawhin YMA in hma a lo lak tawh dan tlangpui report a pe a ni.

Inkhawmah hian Pu Lalthansanga Ralte, Minister, Prof. Lalnilawma, Minister of State, Pu Lalmuanpuia Poonte, Adviser to CM, Lt. Col. Clement Lalhmingthanga leh Pi Prova Chakma, MLA, sawrkar official, tlawmngaipawl, kohhran aiawh leh zirlai naupang te an tel a ni.

Dr. Renu Sharma, Chief Secretary-in a kaihruai a, Rev Dr. K. Lallawmzuala'n hunserh hmangin, ngawlvei te enkawlna lama thawk tha Padma Shri pahnih Pi B. Sangkhumi leh Pu Sangthankima te chawimawina neih niin; ruihhlo that lohna inzirtirna lam hawi thil hrang hrang tih a ni a, Pi Lalzarmawii, Commissioner & Secretary chuan lawmthu sawiin hun a khar a ni.

He ni hi UN General Assembly in kum 1987 December thlaa Resolution a pass anga khawvel puma hman zui tak a ni a. Kumin thupui hi "Kan dinhmun a chiang e, Invenna kawngah tan ila ang u" tih a ni.