Tunlai Nursing hnathawk hmasa bertu leh a hmuchhuaktu, Florence Nightingale pianchampha denchhena khawvel puma International Nursing Day a hman chu vawiin khan Chanmari YMA Hall-ah pawh Trained Nurses Association of India, Mizoram Branch buatsaihna hnuaiah hman ve a ni a, Chief Minister Pu Lal Thanhawla chu Khuallian a ni.

Khuallian chuan doctor-te chu damlote pa an nih angin, nurse te chu damlote nu in ni a ti a. An file khawihte chu mihring, mahni pawh inenkawl theilote leh mibawrhsawmte an ni a, chuvangin in hna bikah hian dawhtheihna te, teireipeihna te, tenchhiatloh te leh chhelna a pawimawh hle a ni a ti a. Pu Lal Thanhawla chuan Mizote hi mahni hriselna lam ngaihthah mi, ei leh ina duh uluk lo, kan it zawng leh chak zawngte um mai thin hnam kan nih avangin kan hriselnain a tawrh phah nasa hle a ni a ti a. Chuvangin hriselna ngaihpawimawh a tulzia mite hrilhhriatna kawngah nurse te chu an pawimawh hmasak ber thu sawiin, hemi lama tan la turin nurse te chu a chah a. Kristian za a za inti hnam hi hrisel ber awm tak, khawvela hnam hrisel lo tak, cancer vei tamna ber kan ni hi ei leh in leh faina lama kan inthlahdahzia tilangtu a ni a, a vanduaithlak hle a ni a ti. Kan kristianna hi rim taka hmang chu ni ila, hnam hrisel tak leh changkang tak kan ni thei a ni a ti bawk.

Nurses Day ah hian Health Worker Training School atang te, RIPANS te,  Apollo School of Nursing te leh Mizoram College of Nursing atang te in hun hman a ni a. Kum 1964 a Trained Nurses Association of India, Mizoram Branch a President nilai, Pi Ramfangzauvi leh Pi C.Lalrintluangi, Nursing Education & Research Committee atang te in thusawi ngaihthlak a ni bawk a.Chawhnu lamah variety programme in a chhunzawm a ni.