Vawiin chawhnu khan Chief Minister Pu Lal Thanhawla chu a Office-ah Sardar Vallabhai Patel National Police Academy-a training mek Indian Police Service Officer 16 leh an Faculty Co-ordinator ten an hmu. Chief Minister chuan IPS te chuan mawhphurhna sang tak an kovah a innghah avangin ram leh mipui tan hleih nei lova mipui rawngbawl sak turin a chah a, an kal zelna turah duhsakna a hlan bawk a ni.

Chief Minister Pu Lal Thanhawla chuan IPS Officer-te training schedule-a India hmarchhak state hrang hrang an tlawh chu lawmawm a tih thu a sawi a. Heng IPS officer training mek a kawmnaah Mizoram leh Mizote chanchin tlangpui Chief Ministe chuan hrilhin, kum 20 chhunga rambuai in Mizoram kawng hrang hrang a nghawng dan te, remna leh muanna atana sawrkar, pawl leh Kohhran anga hmalak a nih dante chhipchiar takin a sawi a. India rama inenhranna awm thin chu amah ngei pawhin a lo tawn dante hrilhin, India rama chengte hi thlahtu leh chi hran pawh ni hlawm mah ila ram neitu kan ni tih hi pawm a tul nia a hriat thu te a sawi a. Ram inrelbawlnaa dinhmun pawimawh luahtute tan phei chuan an hnathawh naah te hlei nei lova, enhranna tel lovin mipui rawngbawl hna thawk thin turin a chah a. India rama cheng khua leh tui tha leh a bik takin sawrkar hnathawk leh mipui rawngbawl hna thawkte tan ram kilkhawr ber chanchin te pawh hriat a tul tih sawiin ram leh a chengte chanchin tlangpui kan hriat hian kan hna hi tha zawk leh sawt zawkin kan thawk thei a ni tih chu hre reng turin a fuih a. Mizoram-in kawng hrang hranga hma a sawn dan te, hmachhawp a neih te leh hmasawnna atana thil pawimawh nia a hriat te pawh a hrilh a. Chief Minister chuan Police officer rinawm, dik leh tha nia an thawhna tur state ah theuh midangte tan kawng engkima entawntlak ni turin a fuih a, an kal zelna turah duhsakna a hlan bawk a ni.

Vawiina Chief Minister hmu tu IPS Probationary Officer 16-te hi IPS Batch 70-na training nei mek mi 120 zing a mite niin, Uttar Pradesh, West Bengal, Chandigarh, Maharashtra, Bihar, Gujarat, Kerala leh AGMUT Cadre ami te an ni. Mizoramah ni thum an chamna a ni tawh a, Mizoram bakah hian Meghalaya leh Assam an tlawh bawk dawn a ni.