Chief Minister Pu Lal Thanhawla chuan vawiin khan Bawngkawn brigade- ah J.Thankima College building sakna tur lungphum a phum.

Chief Minister chuan J.Thankima college bul tan ni a duhsak taka hawn tir anih tawh hnu ah a college building sakna tura a lungphum phum tura an sawm leh chu lawmthu a sawi a. Chief Minister chuan helai hmun hi tun hma chuan ‘community project’ ni thin, BDO hmun tia kan hriat thin ang anih thu a sawi a. Rambuai hnuah sipai hoin luahin, kum 1986 hnuah sorkarin neih kir tumin a bawhzui chho zel a ni a ti a. Sipai ram luahte hi sorkar dan ang thlapa civil administration a an pek kir hma chu khawih danglam a thiang lo a, kum 2008 kum tawpah civil administration ah an pe kir chauh a, mahse hemi hma hian an lo ser vek tawh a ni a ti.

Chief Minister chuan Aizawl khawpui chep tawh takah helai hmun hi hawi thengthawt nan humhalh a, kang meiin a tihchhiat lohna turin tan kan lak tlan a ngai a ni a ti a. Leitan leh Bawngkawn inkar leh Chanmari leh Chaltlang inkar te hi khawhawi ti nuamtu anih avangin sorkar chuan humhalh a, in sa an lo awm tawh anih pawhin kawngpui an aia sang loa sak nise tiin Aizawl Development Authority nen sawiho anih thu a sawi a, mahse duh anga thil tih a har hle a ni a ti. Aizawl kan chep tak em em nachhan chu ringtu ni sia vantlang tan hnawksak hreh miahlo kan tam vang a ni a ti a. Kan kawngpuite hi tlangram hmun dang aiin a te biklo a ni tiin, kan duham vangin mahni ram chhungah kan motor leh lirthei dangte dah phal loin vantlang kawngah ngat kan dah a, garage te sa phal loin man chawia midang luah tir kan thlang zawk a, kan chep phah hle a ni a ti. Chief Minister chuan sorkarin a phak tawk ang zelin hmasawnna kawng hrang hrangah, kawngpui siamah te, power siam chhuah lamah te, rel kawng siam thu ah te, ramdang nena insumdawn tawnna ah te, tui thianghlim in tur ah te, zirna tha leh sang zawk siam kawngah te leh hriselna lamah te a kalpui mek a. Amaherawhchu, kuttling lova sum lak duh pawisa miahlo te avangin kal chak a har hle a ni a ti.

Chief Minister chuan zirlai rualte chu an thatlai hun hmang tha tura fuihin, nakina ram hruaitu tlak ni turin leh mithiam ziktluak leh chhawr tlak ni turin an zirna chu unrhsun taka zir turin a chah a. Zir chhuak ve si chhawr tlak si loh, kuthnathawh hmusit tawh si nih a pawizia ngaihtuah tel thin turin a chah bawk a. Chuvangin mahni nun theuh uluk a, kan pawnlam leh chhung lam nun inthunun a pawimawh fo tih hre reng turin a chah a. Tunlai sualna pung chak takin a tihbuai lohna turin rilru nei ran chunga zir chho zel turin duhsakna a hlan a. An upat hnua inchhirna an neih loh nan an thatlai hun hi tha thei ang bera hmang turin a chah bawk a ni.

Chief Minister chuan puipun khawmna hmun Vanapa Hall te hian mipuite min dawl zawh tawh loh avangin sorkar chuan a aia lian leh changtlung zawk Convention Hall ang chi, mikhual thlen theihna hmun thlenga awm theihna tur a dap mek thu a sawi bawk a ni. Chief Minister chuan tunlai hian thudik tawk lo thehdarh a tam a, thu dik lo dawt hian ke a nei lova, a tlu leh mai thin a ni a ti a. Sorkar-in mirethei tan buhfai man a ti sang tih leh  thisen  man a la tih thuthangte hi thu dik lo a ni a. Dawt hi chu a tlu leh mai thin a ni, a ti.

J Thankima college hi rukruin an computer an ruk sak phuhruk nan Chief Minister te nupa hian Laptop, Desktop Computer leh Printer an hlan bawk a ni.

Lungphum phumna inkhawm kaihruaitu College Principal Pu Ramhmangaiha Ralte chuan college hi kum 1992 ah private college anga din anih thu a sawi a.Kum 1995 ah J.Thankima hian college hi rawn sponsor (bultum) in a hming chawi a J.Thankima college anih tak thu a sawi a. Kum 2002 ah deficit ah hlangkaiin,kum 2007 October ni 11 ah Durtlanga Lalhmingthanga college nen inchhunfinin sorkar college ah hlankai leh a ni a ti a. Mizoram University ah permanent affiliation a in register ani bawk a. College tur hi chhawng nga tur niin bul tan nan DoNER in Rs.28 lakhs chuang a rawn pe a ni.