No.1830/2021-2022

Aizawl the 13th August, 2021:
Chief Minister Pu Zoramthanga chuan vawiin khan Tuidamah kilometre 84.50 a sei Khedacherra-Damcherra-Zamuang-Kawrthah-Tuilutkawn (KDZKT) Road chu a hawng. North Eastern Council (NEC) atanga sum hmuh hmangin Mizoram Public Works Department chuan he kawng hi single lane atanga intermediate lane a siam hna hi a thawk a ni.

Chief Minister Pu Zoramthanga chuan kawng hawnna puala inkhawm tawi buatsaihah ei leh bara hmasawnna atan kawng tha leh inkalpawhna tha neih a pawimawh thu a sawi a. KDZKT kawngpui chu Zoram pum tan leh a bik takin khawtlang tan tangkai tak a nih thu a sawi a; hmabak la awm pawh zawh thuai a beisei thu a sawi. COVID-19 hrileng in hun rei tak min chenchilh tawhin, hei hian hmasawnna hna hrang hrang a tih thuanawm phah chungin, thawktuten theihtawp chhuaha hma an lakna chu lawmawm a ti a ni.

Chief Minister chuan ei tura intodelh chu sawrkarin ngaipawimawhin, thawhhona tha tak nen ram intodelh leh entawntlakah kan ram hi kan siam theih thu a sawi a. Mizoram pumpui tan chaw a intodelh tur chuan thingtlang lo neih a kumtin ram vah kual nilovin, leilet a siam theih lai lai leiletah siama khawl hmanga enkawlin, tha sen ngai tam silovin buh kan mamawh chu kan tharchhuah mai tur thu a sawi a. Tunhnaia kan boruak tawn atangin thlai leh thei lamah kan intodelh thei tih a lan thu te, sa leh thildang rem chang apiangah intodelh a tum thu a sawi a. Chief Minister chuan sum chang thlai te hi a nih ang anga thawn chhuak mai lovin, hlawkna tam zawk kan hailuh theih nan mahni ram chhungah ngei man man zawka siam turin processing plant te dahin, kawng hrang hranga hmalak theihna a awm thu a sawi.

Chief Minister chuan sawrkarin a tih ve tur chinah theihtawp a chhuah zel tur thu sawiin, kan rilru leh ngaihtuahna te siam tharin, kan ram hi ropui taka siam tura kan Pathianin min duhna hi vawng chunga kan theih chin theuhah thawk hlawm ila, tiin mipui a sawm a ni.

Mamit bialtu MLA Er. H. Lalzirliana, Road and Infrastructure Development Board Vice-Chairman chuan tun hnaiah Mamit district chhungah hmasawnna hmuh tur tam tak a awm chho chu lawmawm a tih thu a sawi a. Hmasawnna ruhrel tha zawk siam a nih avangin Mamit district tlangdung hrang hranga chengte chu pheikhai rual zawkin hmasawn turin ke an pen phah thu a sawi a. Vawiina hawn tak kawng thar chu Hachhek tlangdung zawha thenawm state thlunzawmtu a nih avangin economic road pawimawh tak a nih bakah Tripura kan unaute nen pawh inpawhna tha siamtu kawngpui pawimawh tak a nih thu a sawi a. Kawngpui hmangtute chu dimdawi tak chunga enkawl thiam turin a chah a ni.

Vawiina kawng hawn tak hi a project hmingah 'Improvement & Upgradation of KDZKT Road from Single lane to Intermediate lane' tia vuah niin, North Eastern Council (NEC) Commission chuan January ni 9, 2013 khan hemi atan hian cheng vaibelchhe 134.70 (estimate amount) a sanction a. State in a tum ve tur chu 10% a ni. M/S DRAIPL & ABCI Ltd (JV), Guwahati te chu 25th May 2015 khan cheng vaibelchhe 179.63 hmanga he kawng siam hna hi thawk tura thlan fel an ni a. Sanction leh work order pek karah rate thar a chhuah avangin thawk tura intiamna zat hi sang ta a ni. July ni 1, 2017 atanga GST hman tan a nih takah khan kawng siamna tur sum mamawh zat hi ennawn leh a ngaih phah a, cheng vaibelchhe 183.27 a siam danglam lehna chu phalna ngaihchan mek a ni. He kawng hi a vaiin kilometre 89.50 tur niin, Tiger Reserve Area paltlang tlem a awm a. Helai chhunga hnathawk tur hian phalna hmuh lawk theih loh avangin hna a khawmuan phah bawk a. Chutichuan hemi thawh tur la bang kilometre 5 chu single lane a chhunzawm tur a ruahman ni bawkin, thawh zawh thuai beisei a ni.

He project hian Formation Cutting (89.50 km); Unlined side-drain (45.30 km) leh lined side-drain (25.99 km); Protection works (9085.94 Rm); Hmarliana lui chunga 35 Rm a sei lei dawh; 325 Cross Drainage Works (325) leh 74.70 km thui Intermediate Lane (5.50m a zau) leh 14.80km Single Lane (3.75m width a zau) te a keng tel a ni.

Kawng thar hawnna inkhawm, Mizoram PWD in Presbyterian Kohhran Hall, Tuidama an buatsaih hi Addl. Chief Secretary Pu JC Ramthanga chuan a kaihruai a. Chief Engineer, Roads Er. Bowman hnen atangin technical ngaihthlak a ni a, Engineer-in-Chief Er. Lalmuankima Henry chuan lawmthu sawiin hun a khar a ni.

Chief Minister hian Laldenga Football ground, Tuidama siam hna thawh tan mek chu a hmunah a en nghal bawk a ni.

Vawiin programme hi NEC in Independence Day 75-na puala ram puma Azadi Ka Amrut Mahotsav movement kalpui mek puala a bultum a ni.

Attachment

  • Loading attachment...