No.3443/2021-2022
Aizawl 17.12.2021: Chief Minister Pu Zoramthanga chuan vawiin khan Keifang khua kum 100 tlin lawmna pui ber leh kharna chu khuallian niin a hmanpui. Sangtea Memorial Centenary Basketball & Volleyball Court a hawng nghal bawk.

Chief Minister chuan Keifang khaw mipuite chu an kum za tlin a lawmpui thu sawiin, lawmna program a hlawhtlin theihna tura tha leh zung nasa taka sengtu organising committee leh khawtlang mipui chungah lawmthu a sawi bawk a. Keifang khua chu kawngpui pawimawh intawhkhawmna khua, la thang chauh tur a nih thu a sawi a. Khaw mipuite pawhin thahnemngaia hmasawnna ruhrel dinna tur an lo sawipui te pawh a remchan dan anga a lo ngaihtuahpui zel tur a sawi.

Chief Minister chuan ram dinhmun ngaihtuah chungin hmathlir tha tak nei chunga khua hmasawnna tur ngaihtuah zel turin mipui a chah a. Eizawnna kawngah sawrkar hna in mi zawng zawng a daih vek lo in, sawrkar hna a innghah ringawt theih a nih loh thu a sawi a. Chungah chuan kan ramin asset kan neih, kan leilung leh boruak tha atang hian malsawmna haichhuak turin, ngaihtuahna seng a taima taka thawkin, hma a sawn theih thu a sawi. Hemi kawngah hian sawrkar pawhin hma a lak thu sawiin Chief Minister chuan tangkai leh hlawk tham a hmang turin leilung behchhana eizawnna hlawk tham, mipui sum lakluh tipung turin hma a lak thu a sawi.

Keifang khua Centenary lawmna hi Centenary Sports Complex ah buatsaih niin, December ni 13 atang khan lawmna neih tan a ni a. Centenary Football Exhibition Match buatsaih ni bawkin, vawiin lawmna pui berah hian thusawi leh zai nen hun hman a ni.

Chief Minister hian Saitual DC Complex sak hna thawh mek chu a hmunah tlawhin a enfiah nghal a ni.