541/2026-2027

Khawzawl the 15th May 2026: Vawiin khan Chief Minister Pu Lalduhoma chuan Khawzawl Vengthar YMA Hall-ah Khawzawl Sub Headquarters YMA Conference vawi 2-na chu khuallian niin a hmanpui a. YMA member te chu khawtlang leh ram nuam siam tura thawhpuiah a sawm.

Pu Lalduhoma chuan, Khawzawl chu a khua ang maia a ngaih, mipuite pawh a unaute ang maia a en an nih avangin, an kianga awm nuam a tih thu a sawi a. Mahni awmna hmun theuha khawtlang nuam leh ralmuang siam zel tura fuihin, kawng tinrenga sorkar thawhpui turin a sawm.

Mizoten YMA kan nei hi kan nihlawh hle a, YMA anga mi zawng zawng huikhawm a, khawtlang thuiphui thei pawl hi ram dangah an awm ka ring lo hial. Chuvangin, YMA hi kan tan ram rotling a ni.

Kan thalai tam takten ruihhlo an ngaih avangin YMA hian kumpuanah “Ruihhlo Do” a hmang mek a. Sorkar pawhin ruihhlo hi kan do nasa a, a ngawlveite chhanchhuahna pawh kan kalpui a. Kan hmalakna tinrenga kan kutke pawimawh ber chu YMA in ni deuh zel a. In chungah kan lawm hle.

YMA hi Zo nun ze mawi tinrengte chhawm nunga, thangtharte hnena zirtirtu a ni bawk a. Tun hnaiah Mizoramin khualzin kan ngah hle a, min rawn tlawhtuten min fak fona pakhat chu kan Zo nun ze mawi tak tak an rawn hmuhte hi a ni. Nghahloh Dawr ringawt pawh hian an thinlungah thu a sawi nasa em em thin. Tunah chuan Zo nun ze mawi hi khualzinte hip thei khawpa mihring nun mawi a ni tan ta a. Ka zain i uar deuh deuh ang u. YMA pawh lo tang sauh sauh rawh u.

Thlai thar kan lei atanga chiang taka kan hmuh chu Mizoram khaw chhak lam hian thlai in tharchhuak tam tih hi a ni a. Mi taima in tam tihna a ni. Hma in sawn zel theih nan ruahmanna hrang hrang kan siam a. Tun kar Nilaini liam ta khan Sawhthing Unique Selling Proposition Project, cheng vaibelchhe 190 vel senna tur kan hawng a. Kan hawn tlaiah a processing unit dinna tur sum Rs. 30.13 Crore chu DoNER in an rawn sanction nghal a. Khawchhak lam bial zawng zawngte inhmantawm turin Champhai leh a chhehvelah kan din dawn a ni, a ti a. Khawzawl District chhunga sorkar hmalakna langsar zualte a tarlang bawk.

Ram hmasawnna hi remna leh muanna boruak hnuaiah chauh a kalpui theih tih tarlangin, remna leh muanna ngaihlu a, vawngtha tlat turin YMA member te a sawm a. Ramngaw leh Nungcha humhalhna kawnga tha taka hma an lak thin avangin lawmthu a sawi.

Vawiin vantlang inkhawm hi Pu Vanlalsawma Colney, Vice President, Sub Hqr. YMA in a kaihruai a, Tv. Lalrintluangan hunserh a hmang a, Prof. Malsawmliana, General Secretary, CYMA chuan YMA kumpuan "Ruihhlo Do" hmangin thusawina a nei a. "Rualtin khumtu YMA" tih hla leh hla dang tam tak phuahtu Pu V. Thangzama, nizana boral ta sunna hun an hmang bawk.

Khawzawl Sub Hqr huam chhungah hian Group YMA pali, Branch 42 an awm a. Member hi 19,899 an awm mek a ni.