Vawiin khan Khawpuia Memorial High School Golden (KMHS)Jubilee Lawmna Pui leh a ni hnihna chu Chief Minister Pu Lal Thanhawla’n a hmanpui a. KM High School kum 50-na champha lawmna niah hian he school tanga  lo zirchhuak tawh zinga School ti hmingthatute bakah Zirtirtu hmasa leh School dintute zinga mi te hnenah chawimawina hlan a ni.

KMHS Golden Jubilee Lawmna Pui a khuallian Chief Minister Pu Lal Thanhawla chuan kum 50 chhung zet hlawhtling taka zirtirna kalpuia zirlai hlawhtling tak tak, ram leh hnam tana tangkai tak tak te chherchhuahna atana  an theihna zawng zawngte lo hlantute chungah lawmthu a sawi a. KMHS dinna atana sum thawhtu Pu Khawpuia leh a chhungte leh KMHS dintu Pu Lalthankima, Headmaster hmasaber ni bawk te chu  zah leh chawimawina pek an phu a ni a ti.

Chief Minister Pu Lal Thanhawla chuan Mizoram chhunga eizawnna siamtu pahnih Sawrkar leh Kohhranah te hna a tam tawk lo a. Zirlai tam tak an zirna tha taka zir zo tawh te tan pawh hnathawh tur a tlem chhoh zel avangin mahni kutkea ding thei zirlai chherchhuah a pawimawh hle a ni a ti. Zirlai thiamna ziktluak loa zirtirna pek chu thil pawi thei a nih avangin  zirtirtute an tan hle a ngai a ti a. Kawhmawh bawl lo in sawrkar thuawih takin an awmna hmun apiangah zirtirtu tha zirlaite hnena export quality education pe thei nih an tum theuh tur a ni a ti. Zirtirtute chu mithiam  Mizoram pawna hnathawk thei tura thawnchhuah tlak leh ngaihtuahawmlo chher tum tur a chah a. Zirlaite tan entawntur leh ngaihsanawm  ni turin zirtirtute chu  faina, hawihawmna, taihmakna, inpekna, incheina, hriselna leh kawng tinrengah entawk tlak nun nei mi an nih angai a ni a ti.

Zirlai ni mek leh thalai te chu ramhmangaihna rilru puiin ruihlo, zu leh vaihlo kaihnawih laka inthiarfihlim turin a ngen a. Hma la chak turin hriselna a pawimawh tih sawiin Kristian tamna ram ni si hrisel lo anga langsar nih te chu thil mawihnai lo a nih a vangin a siamtha theitu thalai chak zawkte kutah mawhphurhna pawimawh tak a awm mek a ni a ti. Mizo thalaiten midang elna chang an hriat a tul tawh thu sawiin, "Tunhmaa Hindi tawng hmuhsit leh English tawng zah leh tlat ang kha bansan a hun a, Mizoram sawrkar leh kohhranah te hnathawhtur tam tawk a awm loh avangin rampawnah ei zawnga chhuah belh zel kan intihhmuh a ngai a. Chung atan chuan Hindi leh English thiam a pawimawh hmasaber a. Hnasang  leh hnatha thawk tur erawh chuan Export Quality Skill leh Education neih a ngaithung a ni", a ti.

Chief Minister Pu Lal Thanhawla chuan All India Service hrang hrang, Central Services hrang hrang, Sipai lam chi hrang hrang a Officer leh Sipai hna-ah te tunhma chuan hmarchhak state zingah Mizoram chu a sang fal thin tih sawiin tunah erawh Mizoram chu a hnufum bik tih a tarlang a. Mizo thalai ten an tum phawt chuan India ram mai ni lo khawvel huap pawhin midang tih theih ang theihna an nei tih a chiang a. Chutiang rilru chu pu thar leh se a duh thu a sawi a. Tumruhna, taihmahna, rualawhna dik, thawhrimna  leh tuarchhelna nen engkim a hneh theih tih rilru Mizo thalai ten an put leh hunah kawng engkimah midang te entawn kan ni leh thei ang tih a sawi a ni.

Jubilee Lawmna Pui programme hi Organising Chairman leh Chief Secretary Pu Lalmalsawma'n a kaihruai a. He hunah hian KMHS atanga zirchhuak mihlawhtlingte leh he School dinna atana sulsute chawimawina hun hman a ni a.  He school atanga zirchhuak zinga  All India Services leh Central Civil Services a inziaktlingte - Pu Lalmalsawma, IAS, Pu Lalram Thanga, IFS, Pu C.Lalhmachhuana, ITS leh Pu V.Lalfala, IFS te chuan lawmpuina Chief Minister Pu Lal Thanhawla hnen atangin an dawnga.  Special Award dawngtu pahnih Lalrintluangi, Mt.Everest lawnchhuaktu leh MPSC Chairman Rev Zosangliana Colney te chuan Chief Minister nupui Pi Lal Riliani kut atangin chawimawina an dawng thung. Pu Khawpuia chhungkaw aiawhin Pu F.Lalfakzuala chuan  KMHS dintu Pu Lalthankima leh a thawhpuite hnenah chawimawina a hlan a. Chawimawina  dangte pawh sem niin heng te hi Cooperation Minister Pi Vanlalawmpui Chawngthu, Bialtu MLA Pu Lalruatkima, Ward Councillor Pi Zonunsangi Fanai te bakah he school atanga zirchhuak Pu Lalram Thanga, Principal Secretary to Chief Minister, PWD E-in-C Pu R.Vanlaltluanga, I&PR Director Pu David L Thangliana leh KMHS  Principal leh Headmaster lo ni tawh ten an sem a ni.