4221/2025-2026

Buhchangphai the 30th January 2026: Vawiin khan Chief Minister Pu Lalduhoma chuan Buhchangphaia SSB Agro ten Kuhva sawngbawlna khawl a hawng. Pu PC Vanlalruata, Minister, Agriculture & Farmers Welfare chu khualzahawm a ni a, Pu Lalfamkima, Dy. Speaker leh Pu Lalmuanpuia Punte, MLA, Adviser to CM ten Chief Minister hi a tawiawm bawk.

A hawnna inkhawmah thusawiin, Chief Minister chuan, department chhinchhiah danin Mizoramah kuhva huan hi Hectare ­­­­­­­­30,000 vel a zau a awm mek a, nikum 2024-2025 chhung khan Mizoram puma Kuhva tharchhuah zat hi Quintal 2,00,000 vel nia chhut a ni a. Eizawnna ngelnghet leh hlawk tak a nih avangin sorkar chuan Kuhva phun belh zel hi kan support-a, Handholding Scheme leh CM Special Package hnuaiahte dilna thehluh theih a ni.

Vanduaithlak takin kum 2021 vel atang khan kan kuhvate hi a tam hriin a man tan a, kung tam tak kan chan phah tawh a, a pawi khawp mai. Central Plantation Crops Research Institute (CPCRI) atanga scientist lo kalte hmuh dan chuan Kuhva kung hrisel lohna chhan bulpui ber hi tui tlakchham (Water Stress) vang leh leitha tlakchham vang niah an ngai a. Chuvangin, kan kuhva huante uluk taka kan enkawla kan duat a tul a, tuihna humhalh kawngah pawh kan than harh a hun tawh hle a ni.

Kum thum kum li kal ta vel atang khan dan lova Kuhva ro tawlh rukna a nasat avangin kan Kuhva chingtuten a hralhna kawngah harsatna an tawk nasa hle mai a. Kan han sorkar ve leh khan kan Home Minister Pu K. Sapdanga kaihhruaina hnuaiah ruihhlo leh Kuhva tawlhruk chu theihtawp chhuahin kan do ta a. Kan man nasaa, a dahna kan nei seng lova, kan Magistrate ten a tihralnate pawh an ngaihtuah a nih kha. Tihrem vek chu har deuh mahse kan thawk tha tih tilangtu chu kan kuhva chingtuten an hralh that ber kum an thleng ta hial kha a ni.

A ruka tawlh kan do rual chiah hian kan ram chhungah ngei a process-na neih tul kan ti a. Mimal emaw Company emaw hma la thei tur kan dap a. Sorkar pawhin hma kan la bawk a. Sorkar lam hmalakna ah chuan tunah hian Chemphaiah leh Zamuangah cheng vaibelchhe sarih leh nuai sawmli pathum sengin a process-na hi kan din mek a. Nakkum lamah hawn theih kan inbeisei.

Private Company, min rawn dawrtu zinga rintlak tak mai chu SSB Agro te hi an ni a. Kum 2024 June thlaah Buhchangphaiah hian a hmunhma tur ram leiin bul an tan a, an tum ang ngeiin reiloteah khawl chak tak, darkar khata pum 3000 kheh thei an din fel a. Vawiinah kan lo hawng thei ta a ni. An chungah kan lawm hle.

Loneitute hnen atanga Kuhva leia an hnenah hralh leh tu (Procurement & Supply of Arecanut) turin Mizoram Agriculture Marketing Cooperative Society (MAMCOS) te nen inremna an siam tih te ka lo hria a. SSB Agro hmalakna zar zotu pawh kan tam dawn tih a chiang a ni, a ti a. An kal zelna turah duhsakna ka hlan a ni, a ti.

Pu PC Vanlalruata pawhin thusawiin, Kuhva hi hnam dangten a par laiin an kharsak a, an lei tlawm thei em em mai a. A tuartu chu Kuhva huan neitute an ni. Market ngialnghet neih hi tul kan ti hle a, vawiinah chu mi atana pawimawh tak mai chu a process-na hi a ni. Kuhva huan neitute tan a hlu em em a ni, a ti. Thlai sawngbawl hi a man titotu a nih avangin kan farmer ten man man zawka an thlaite an hralh theih nan kan uar deuh deuh dawn a. Sawhthing, Aieng leh Hmarcha thlengin a sawngbawlna hi din kan tum a ni, a ti bawk.

Pu Sangbiak Lal Khuptong chuan Technical report a pe a, Kuhva process na khawl kan din chhan ber chu Mizorama kuhva chingtuten a hralhna lama harsatna an tawh vang kha a ni a. Kuhva leh a kaihhnawih sumdawnna hrim hrim hi chu kum 20 vel kan lo buaipui tawh thung. Mizorama kuhva tharte hlawk zawk leh awmze nei zawka hralh a nih theih nan, loneitute hmakhua ngaiin, Chief Minister thahnemngaihnate hre chungin kan din a ni.

Darkar khatah pum sangthum vel kan kheh thei a, khawl pathum a awm a. A chhumna thuk pathum a awm leh a, Ni saa pho ro tur a ni. Chu mi zawhah her sawm leh tur a ni a. A herna khawl hi kawngah a rawn kal mek. Her sawm kher lo pawh hian kan hralh thei tawh a ni, a ti.

A hawnna hunserhah hian Rev Solomon Lalmuanpuia Khiangte chuan Industry thar hlanna a nei a ni.