Chief Minister Pu Lal Thanhawla chuan vawiin tlai khan Lengpui Airporta khawchhiat pawha thlawhna tum tir leh thlawhchhuah tir theitu, Instrument Landing System (ILS) bun fel tawh chu a hmunah a en.

Lengpui Airport Terminalah inkhawm tawi GAD Civil Aviation Wingin a buatsaihah Chief Minister chuan Mizoramin Airport puitling nei tura hma alo lak tawhna thin te sawiin, a tira hma a lakna chu mithenkhatin nuihzata fiamthu thawh nan tea an hman thin thu a sawi a. Chutichunga harsatna tam tak karah India rama state sorkar siam leh state sorkar ta airport awm chhun kan nei thei hi Pathian hnenah lawmthu sawina tawngtai nen an hlan a ni a ti a. A enkawl chungchangah Mizoram sorkarin sum lama duh ang a neih loh avangin tih zauh belh hnate, air traffic control tower tih len belh leh thil dang tul tak tak tih phuisui ngai tam tak a tih theih loh thu sawiin, tunah hian Airport Authority of India nen a enkawl thuah an in dawr reng thu a sawi a. Mizoram sorkarin a theih chen chen chu enkawl hrih a tum a ni a ti. Indian Air Force lam pawhin Lengpui Airportah hian fighter aircraft dahna tur hmun an dil thute sawilangin, ram thang zelah Mizoram chhimlamah pawh thlawhna tum hmun mamawh anih dawn avangin siam tura sorkarin hma a lak mek thute a sawi bawk. Chief Minister chuan Tuna Lengpui airport hi a tira duan angin zinmi thlawhchhuak tur 300 vel leh lo thlawk lut tur mi 300 vel bawk dawl tura siam a nih thu a sawi bawk a ni.

Chief Minister in a kal chhan ber Instrument Landing System hi Cheng vaibelchhe 3.52 senga bun a nih thu Wing Comd (Rtd) Lalzawma, Principal Consultant, Civil Aviation chuan a ti a. Kumin 2011 August ni 2 a hman tan tak ILS avang hian thlawhna te ATR-72 chuan visibility minima ah 3600 metres atangin 1300 metres ah a tlak hniam theih phah a. Thlawhna lian chi Airbus-319, 320/ Boeing-737 visibility minima pawh 5000metres atangin 3500 metres ah a hniam phah thei bawk a ni.

Chief Minister hi thlawhna runway tawp, chhim leh hmara ILS dahte chu tlawhin mithiam ten hna a thawh dante an hrilhfiah a ni. Chief Minister tawiawm hian Airport Authority of India a thawkte, PWD official te leh MJA memberte an kal bawk a ni.