No.6809/2020-2021 

8.12.2020: Vawiin khan Chief Minister Pu Zoramthanga chuan Mizoram Youth Commission (MYC) hmalakna thar - "Livelihood Generation for Returned Migrant Workers" chu Aijal Club-ah a tlangzarh. He hmalakna hi Mizoram mi leh sa state pawna inhlawh, COVID-19 avanga hna chan a Mizorama lo let te an intundin leh theih nan eizawnna bultan theihna tura ruahman a ni.

Chief Minister Pu Zoramthanga chuan nasa taka khawvel chawkbuaitu COVID-19 natna hrileng avangin Mizoramah pawh harsatna hrang hrang kan tawk a; Mizoram mi leh sa state pawna inhlawha eizawng tam tak pawh loh theih lohna avangin an hna atanga thlawn ta, Mizorama lo let a eizawnna bultan thar a ngai ta chu pawi a tih thu a sawi a. COVID-19 hrileng karah hian tunah chuan khawvel hian damkhawchhuah tumin a bei a, vawiinah pawh eizawnna chan ta ten bul thar an tan theihna tura ruahmanna siam a ni chu lawmawm a ti a. Hun leh remchanna hmang thiam apiangte hi mi vannei an nih thu Chief Minister chuan sawiin, eizawnna bultan thar leh turte pawh chu hlawhtlinna sang zawk an chan theih nan theih tawp chhuah a, remhriatna te hmang thiam turin a chah a ni.

Chief Minister chuan Mizo thalaite zingah IAS leh central service danga tling an tlem ta hle chu tan lak ngaihna thil a nih thu sawiin, India hmarchhakah state mipui nen khaikhin a central service a tling tam ber nih tum turin theihtawp chhuah a, tumruhna leh thahnemngaihna nen kan bei tur a ni, a ti a. Mizoram tan IAS cadre hran nei tura sawrkar laipui a nawr chhunzawm zel a nih tur thu leh, coaching leh sponsorship programme a kalpui pawh theihtawp chhuah a nih zel thu a sawi. Chief Minister chuan tunlai khawvelah zirna mai bakah kawng hrang hrangah eizawnna tha a awm thu leh theihtawp chhuahte tan kawng a awm zel thu a sawi bawk.

MYC Chairman Dr. Vanlaltanpuia chuan COVID-19 avangin thalai mi chhenfakawm tak tak, inhlawhfaa kan rama sum leh pai laluttu ni thin te loh theihloh avanga an lo haw te chu bultan thar lehna tur siam ngei a tul thu sawiin, Supreme Court pawhin migrant worker te an state in chhawmdawlna lo pe rawh se a tih angin an thlavang hauh turin theihtawp chhuaha hmalak a nih dan a sawi a. State pawn atanga lo haw te list siamin, zirlai ni lo hnathawk, hna chan ta ni 2637 an chhinchhiah a ni. NEC ah project an thehluh chu pawm sakin crore 3.3 hmanga kawng hrang hranga hmalakna tur chu vawiin tlangzarh a nih theih tak thu MYC Chairman chuan a sawi a ni.

Dr. C. Vanlalramsanga, Commissioner & Secretary chuan economy peng hrang hrangah sawrkarin hmasawnna ruhrel changtlung tak tak siam tura hma a lak mek thu a sawi a. Tuna COVID-19 in India a nghawng nasat avangin mahni state pawn a hnathawk a awm, loh theihloh a an hnathawhna atanga ban, mahni state a kir leh ta chu mi vbc 1.4 zet an awm thu a sawi a. Mizoram migrant worker-te him taka an lo haw theih nan nasa taka sawrkarin hma a lak thu leh, let duh, let theilo awm lo a hriat thu a sawi a. Heng mite tana eizawnna tha ruahmanna MYC in a lo ngaihtuah chu lawmawm tiin returned migrant worker te vannei a tih thu a sawi a. Mizoram economy-ah danglamna thlen thei hial tur nia a rin thu a sawi. Dr. C. Vanlalramsanga hian he hmalakna kalpui dan tu tlangpui a sawifiah bawk a ni.

Livelihood Generation for Returned Migrant Workers due to COVID-19 hian a tum ber chu eizaawnna tana thiamna mamawh inpekna (skill training), a taka thawk thei tura exposure pekna (internship programme), hnathawhna tur infrastructre ruahmana leh kaihhruaina tha taka thawk tura ruahman pui te a ni a. Component hrang hrang 7 a awm a. Chungte vhu:

1) District zawng zawnga kalpui tur Entrepreneurship Development programme. Hei hi sumdawnna tlanglawn nilo, mahni kutke a thluak themthiamna hmanga eizawnna tihhmasawnna lam haw niin, hemi atan hian Planning Department, Commerce & Industries leh MYC tangkawpa kalpui tur a ni. Mi 550 vel he hamthatna chhawr thei tur hi awm tura beisei a ni.

2) LESDE in an buatsaih tur skill training. Mi 150 target an ni a, hna rum deuh hlek thawk thei tura ngaihte tana ruahman a ni.

3) Mizoram University Innovation Centre kalpui tur Internship cum Entrepreneurship Skills training. Hemi hnuaiah hian firm hlawhtling tak takah internship kalpui tur niin, an lo rawh zui zel theih nan emaw, anmahni kuke ngeia an din theih nana thiamna chher chhuahna tura ruahmanna niin, mi 100 target a ni.

4) Entrepreneurship and Skill training for Home based food processing, Mizoram Food Processing, Research and Training Centre-a kalpui tur. Mi 120 target a ni.

5) BPO, animation, gaming, design leh thil danga thawkte hi migrant worker zingah an tam avangin infrastructure a hranpa tawp a dinna atan cheng nuai 17.5 dah a ni a. Hemi hian mi 637 hian hemi behchhan hian eizawnna an neih theih rin a ni.

6) Tour Guide ni tura training pek- mi 100 target a ni.

7) Mahni inlum atanga sumdawnna E-commerce.

Heng component hrang hrang hi department hrang hrangin MYC kaihhruaina hnuaia an kalpui tur a ni. Thla riat chhunga zawh hman tura beisei a ni.