1582/2023-2024

Dated Aizawl,the 19th August, 2023: Tukin zingkar khan Chief Minister Pu Zoramthanga chuan Luangmual khawtlangin an veng Thlanmual panna kawng siam that leh an Playground tihhmasawn an dil leh SEDP hmanga thawh veng chhung kawng siam tharte a hmunah kalin a enpui.

Chief Minister hian Luangmual Thlanmual tlawh hmasain a panna kawng tihzauh te, Concrete Pavement a a kawng chhun a tulna te a hmunah a hmuhpui a, chumi hnuah Luangmual Tlanga an Playground; phullem phah an dil hmun a tlawh leh a, Playground leh YMA Hall inkara kawngkal, SEDP atanga tha taka concrete pavement an siam thar pawh a en nghal a ni.

An hmunhmate a ensak hnuah Pu H. Lalramliana, Local Council Chairman inah khawtlang hruaitute leh tlawmngaipawl hruaitute nena inkawmhona buatsaih a ni a. He hunah hian Chief Minister chuan Luangmual khawtlang mamawh thilte chu sawrkarin theihtawp chhuahin a ngaihtuahsak dawn tih a hrilh a. A tul angin a changtu department ten an rawn enzui nghal ang. Chutihlaiin kan hriat angin inthlan hmachhawn mai tawh tur kan ni a tun maia han chin fel nghal a theih tawh rih lova, Pathian zarah sawrkar tharah hun thate kan nei leh a nih chuan kan bawhzui thuai thei turah ka ngai a ni, a ti. SEDP sum hmanga veng chhung inkalpawhna kawng tha taka an lo siam avangin khawtlang hruaitute chungah lawmthu a sawi a ni.

Bialtu MLA Pu Zothantluanga pawhin thu sawiin a bial chhunga mamawh an neih, Chief Minister hnena an thlen apiangten ngaihven zui a hlawh zel thin a, a hmun ngeiah te lokalin theihtawp min chhuahpui thin a, tun tumah pawh kan dilna te a hmun ngeiah a rawn en leh hi kan lawm tak zet a ni, a ti. Pu H. Lalramliana, Local Council chairman leh Pu Lalrintluanga Sailo, MLA te pawhin thusawina hun an hmang bawk.

Chief Minister hi Pu Lalrintluanga Sailo, MLA, Deputy Government Chief Whip leh Luangmual bialtu MLA Pu Zothantluanga ten an tawiawm a ni.