Vawiin chawhma khan Lunglei Convention Centre-ah Chief Minister Pu Lal Thanhawla chuan All Mizoram Farmers Union (AMFU) leh CISR-NEIST, Jorhat te thawhhona "Aroma and Phyto-Pharmaceutical Mission" a hawng a. He Misssion hnuaiah hian kuthnathawktu ten tinreng hriak/ sumchang hriak (essential oils) siamchhuahna chi hnimhnah -Citronella leh Lemongrass te an ching dawn a. Chief Minister in Aroma and Phyto-Pharmaceutical Mission a hawn hnu hian kuthnathawktu ten Citronella leh Lemongrass an tharchhuahte lo leisaktu tur Sunflag Agrotech te leh AMFU ten thawhona thuthlung an ziak a ni.

Chief Minister Pu Lal Thahawla chuan tunhmaa mithiam te leh Missionary te sulhnu atangin Mizo chu ramhmul, hnimhnah damdawi chi hrang hrang te awm tamna hmun tih a chiang a. Hnimhnah chi hrang hrang te damdawi a siam a nih a sum siamchhuahna atana hman a nih theih nan Thenzawl a Ayush Hospital-ah Research Centre din tum a ni a. Dilna Central sawrkar hnenah thehluh a ni tawh a ni a ti. 

Mizoram economy ti hrisel thei tur leh state per capita income ti pung thei tura AMFU in hmalakna a rawn chhawp chhuak thei chu lawmawm a tih thu a sawi a. AMFU hmalakna chu a remhriat thlak tih sawiin Mizoram, hmun nuam ber, leilung thaber, thlai leh thei chitinreng te thatna hmun a hausakna inphum haichhuak turin a ngaihna hria mithiam tam zawk an rawn penchhuah a ngai a ni a ti.

Chief Minister chuan tunhma in company te thurawn ang leh duhzawng thlai ching thin mah ila company duh khawp tharchhuah a nih thin loh avangin thawhhona a awm chhunzawm thin lo a ti a. Company mamawh zat, vaiho pawn tam an tih ang tharchhuak tura tan lak a ngai a Mizo ten tam kan tih hi company te nen thawho a nih dawn chuan a lo tlem thin a. Chuvangin hlawktham tura tam  thar tura tanlak a ngai a ni a ti.

"Kuthnathawktute chawikanna kawngah harsatna awm thin pakhat chu Sawrkar hnathawk thenkhat kuthnathawkte dawntur tanpuina sum a hlawkna hmuh tum a lo awm thin hi a ni a. Hetiang tihching in hria a nih chuan hremna pe thei, thuneitu sang zawk te hriattir ngei ngei tur a ni", a ti. Sawrkar hnathawk emaw kuthnathawk te pawh an mawhphurhna leh an eizawnna chu an rawngbawl tih an hriat atul thu a sawi a. Ram leilung fate zawng zawng chuan mawhphurhna an neih dan a in ang tlang vek a. Ram hmasawnna tura tanlak ngai laiah pawh lungrual taka thawhho vek a tul a ni a ti.

Thusawitu dang, khual zahawm Dr. Pinaki Sengupta, Director i/c CSIR - NEIST chuan Mizoramah Aroma and Phyto-Pharmaceutical Mission hlawhtlin a rinchhan tam tak a awm tih a sawi a. Mizoram mipui te chu ziak leh chhiar thiam ah a ber zinga mi an nih avang leh Mizo ten a tuina tawh phawt chu, football angah te pawh India ramah a ber an ni thei a. "He Mission pawh hi an tih hlawhtlinpui theih ka ring", tiin AMFU nena an thawhhona chu a beisei awm tih a sawi a ni.

Aromatic Mission hnuaia Lemongrass & Citronela tharchhuah chu man man zawk leh market rate dik takin lei a ni dawn tih Sunflag Agrotech Director Pu Rajrish Awasthi chuan a sawi a. Asia ram dang atang pawhin a lei thova ram chhung thar chhuah chu a lei ngei ngei dawn tia a sawi bakah hriak her chhuahna khawl te pawh Mizoram kilkhawr ber thlenga bun theih a ni a ti a. " He hnim chikhat a tir lam thla 2 thla 3 lek enkawl ngai a hnu a amah leh mah inenkawl thei hlawk zia hi Mizo  kuthnathawk tu ten hria u la tam tak thar chhuah tuma hma la turin ka duhsakna ka hlan che u", ti in lemongrass leh citronela chin a hlawk zia a sawi a ni.

Aroma and Phyto-Pharmaceutical Mission hian India hmarchhak bialah ram Hectare 800 a huam dawn a. Heng zinga Hectare 500 lai hi CISR-NEIST chuan AMFU kaihhruaina hnuaia Mizoram chhunga thawh turin a ruahman a ni.  Citronela leh lemon grass te hi di-lengser an tih ang chi, hriak tam zawk pai a ni a. Hriak a her a nih hma hian heng hnimhnah telkhawm, Kg 1 chu Cheng 800 aia to lo chuan leitur a awm mang lo a. Oil ah chantir in kum 2 chhung hralh lovin a kawl that theih a. Lemon Grass/ citronela telkhawm tonne 1 a rit ah hriak/ essential oil  kg 15 a herchhuah thei a ni.  Heng hnimhnah te hi kum 6 chhung dam thei ni in hemi hunchhung hian vawi 12 seng/sah theih a ni.

Aroma Mission hawnna leh thawhona thuthlung ziahna hun hi AMFU hruaitu ten kaihruaiin he hunah hian NABARD General Manager RK Srivastava, AMFU President Pu  Joseph H. Thanzuala, Dr.Saikia, Sr.Scientist, CSIR-NEIST leh midang te thusawina hun pek an ni a. He hunah hian Chief Minister Pu Lal Thanhawla'n lemongrass leh citronela tiak chu kuthnathawktute hnenah a sem a. Thlai tiak hi tunkar chhungin a rawn thlengkim tura beisei a ni a. Aroma Mission in pilot District ah a thlan angin Lunglei District-ah kuthnathawktu ten an ching hmasa ber dawn a ni.

Attachment

  • Loading attachment...