Vawiin khan Chief Minister Pu Lal Thanhawla chuan Lunglei khawpui tlawhin Lunglei High Powered Committee(HPC) sum senga sawrkar building sak zawh thar pathum a hawng. Lunglei HPC sum senga sawrkar in sak te chu Rs 65.80 Lakh senga sak Lunglei Power Circle, P &E SE Quarter, Rs 48 Lakh senga sak Lunglei Civil Hospital Medical Superintendent Office leh Rs 45 Lakh senga sak District AH & Vety Office te an ni.

Lunglei a Sawrkar In pathum sak thar te hawnnaah hian building thar hawnna programme neih vek a ni a. Heng hun pawimawhah te mipui hmaa thu a sawi naah Chief Minister Pu Lal Thanhawla chuan Lunglei HPC in sum an neih ang te an hmang tangkai a mipui leh sawrkar tan rotling, sawrkar building an sa thei chu lawmawm a tih thu a sawi a. Neitu rilru pua contractor leh department ten hna an thawh zel Zoram mipui ten an phut a ni a ti. Building thar leh tha zawk hawn leh neih a nihin sawrkar chuan a hna thawk te tan phurna thar leh mipui tan tha leh zuala thawh duhna thinlung a pek ngei a beisei thin thu a sawi a ni. Sawrkar Pisa te chu mipui ta a nih angin mipuiin an thil neih, an inchhungkhur an hum halh anga sawrkar hnathawkte chu an uluk pui pawh a ngai tel tih a tarlang bawk.

Chief Minister Pu Lal Thanhawla chuan Mizoram in kawng tam takah hma a sawn mek tih sawiin hmasawnna tehfung pawimawh tak tak zingah Mizoram that falna tam tak hmuh tur a awm a lawm awm hle ani a ti a; NITI Aayog chhuichianna sawichhawngin, “Ei leh in tha khamkhawp hmuh loh avanga hrisello sawina, Malnourishment ah Mizoram chu state dang zawng zawng aiin a ziaawm ber a, kum 2013 atanga 2016 chhunga state 4 – an State Gross Demestic Product(SGDP) pungchho zel chu Mizoram, Jharkhand, Tripura leh Gujarat chiah an ni.State Per Capita Income ah India ram pum aiin kan sang a, Ministry of Finance chhutdan chuan kan state SGDP punna chu 10% in nakum lamah a chho turah a chhut a, tunah hian kan state SGDP punna hi 9% chuang a nih lain National GDP chu kum 2016-17 chhungin 7.6 chiah a ni a, central sawrkarin kan chungah hmasawn turin beiseina a nei a ni”, a ti.

Hmasawnna kawngah Mizoram in ke a penzelnaah chak leh zuala hma a lak theihnan hriselna leh mipui thil tha duh leh sawrkar hnathawkte nawrkal a thawhpuitute bakah thalai mithiam rual mahni a bul tan tum leh entrepreneur rawn ni a midangte tana eizawnna siam tum an pun chhoh zel an pawimawh hle tih a sawi a. NEDP hnuaia MEDMOC in Entrepreneur Development Schemes a kalpui chu thalai mithiam rual ten rawn phur pui zel se sawrkar chuan a duh hle tih a sawi a. Entrepreneur te chu state hausa leh thang mek te innghahna an ni a ti.

Chief Minister Chuan India zalen hma in Mizoram chhimlam chu sumdawnna kawtchhuah a nih thu sawiin tunah a liantham zawk leh international level anga a rawn thlen chhoh leh mek thu sawiin border trade bakah Multi Modal kawngpui ten hun rei vak loah Mizoram tan nasa takin remchanna a rawn siam dawn a; chhim bial mipui te phei chu a hmun neitu an nih angin an thanharh hma leh Mizoram mipui dangte anga an lo inpuahchah lawk bakah an rilru puthmangah siam that ngai lai te a awm a nih chuan an siam that zela an khawvel tukverhte an lo inhawnzau a ngai a ti.

Power ah Mizoram chu nasa takin a inpuahchah lawk tih sawiin Tuirial Hydel Project chu nakum kumtirah hawn tum a nih thu a sawi a, Vankal rama Nizung chakna hmanga Electric Current siam hna chak taka thawh mek anih bakah Tuirini Hydel Project MegaWatt 25 pechhuak thei siamna tur chak taka nawr mek leh a hlawhtlin beiseiawm a ni a ti. Lunglei khawpui lirthei lian deuh ten an pumpelhna tur, Lunglei Bypass road chu a remchang hmasa berah NEDP sum hmanga bultan a ni ang a ti a; nakum lamah Medical Council Of India(MCI) ten MIMER, Falkawn chu an rawn tlawh beisei a nih thu leh chumi huna MCI phalna neih a nih chuan MIMER chu a taka kalpui nghal theih a ni ang tih a sawi a ni. Chief Minister chuan Mizoram chhimlam a zirlaite tana remchanna zawngin Mizoram University Southern Campus Lungleiah hun a nih theih nan hmalak mek a nih thu a tarlang bawk a ni.

Lunglei High Powered Committee(HPC) sum senga sawrkar building sak zawh thar pathum hawnnaah te hian HPC Vice Chairman Pu S.Laldingliana, MLA leh HPC Vice Chairman hlui Pu Joseph Lalhimpuia, MLA ten Chief Minister hi lo tawiawm in Programme-ah te thu sawina hun an hmanga a ni. Pu S.Laldingliana leh Pu Joseph Lalhimpuia te chuan HPC din a nih dan, a hnathawh tawh leh hmachhawp te sawiin Lunglei khawpui tan mai bakah Mizoram chhimlam mipui ten an tawm theih tur sawrkar hmunhma, rotling tak tak te HPC sum sengin Mizoram sawrkarin tam tak a sa tawh tih an sawi a ni.

Chief Minister Pu Lal Thanhawla leh Lunglei MLA pahnih te hi Aizawl leh Lunglei a Sawrkar mi pawimawh ten an tawiawm a ni.