2678/2025-2026

Aizawl the 16th December 2025: Vawiin khan Chief Minister Pu Lalduhoma chuan Aizawl Zotlang Venga Mara Boys Hostel-ah Mara Girls hostel sakna tur te, MADC area-a school thar pariat (8) sakna leh school awmsa paruk (6) chei tharna tur lungphum a phum. Heng zirna inte hi PMJVK atanga sak tur an ni.

Thusawiin Chief Minister chuan, vawiin hi Mara mipuite tana hun chhinchhiahtlak, Mizoram tana zirna lama hmasawnna pakhat a tlingin ka hria a. A puitlin hunah chuan Mara zirlai 3200 ten tangkai takin an chhawr zui thei dawn a ni. Delhi lama Girls hostel pawh kan sorkar tirh atangin kan umzui nghal a. Vawiina kan hmalaknate hian MADC kan ngaihthah lohzia leh hmeichhiate chawikanna kawnga hna kan thawhzia a tilangah kan ngai a ni. Mara thalaite hian zirna an uarin an ngaihlu thin tih hi MPSC exam result atangin a lang chhuak thin a. Chuvang chuan, zirna lama duhsak hi an phuin kan hria a ni, a ti.

Kan sorkarah hian hna muang te, hna chhia te leh a huna zawh loh te hi pumpelh kan tum tlat a. Hnathawh tinreng viltu tur, mipui huapzo Project Monitoring Committee kan nei a, vawiin thlengin project 87 an endik tawh a. Endik tur an an lakhawm zel bawk a. Vawiina a lung kan phumte pawh hi tha taka kan thawh ngei theih nan an rawn vil zel dawn a. A hun taka zawh pawh kan tum tlat dawn a ni. Chuvang chuan, hnathawktuten chak takin hma in lo la dawn nia, tiin a chah. Hmalakna tur sum petu Ministry of Minority Affairs chungah lawmthu a sawi a ni.

Pu M. Laikaw, CEM, MADC chuan he hun hi Siaha atanga online-a rawn zawmin thusawina hun a hmang a. Vawiin hi Mara mipuite tana hun chhinchhiahtlak a ni. Kumin July ni 6 khan Pu George Kurian, Minister of State for Minority Affairs chuan project pahnih min rawn hawnsak tawh a. Vawiinah Chief Minister-in project dang pathum min hawnsak leh a. Tun hnaiah Rs. 30 Crore aia tam project kan nei ta a ni. Chief Minister kaihhruainain Delhi-ah Mara girls hostel kan sa mek bawk a. Mizoram sorkar chungah hian kan lawm em em a ni, a ti.

Dr. K. Beichhua, MLA, Siaha bialtu pawhin thusawiin, Chief Minister chungah hian kan lawm em em a ni, a ti.

Pu A. Viahra, SE, MADC chuan technical report a pe a. Girls hostel hi RCC, chhawng ruka sang, khum 120 leh Dormitory bakah Conference hall nei tur a ni a. Rs. 8.07 Crore senga sak tur niin hunbi tuk chhunga sak zawh tum a ni.

School building thar pariat hi Rs. 5.76 Crore senga sak tur niin, RCC, a chung rangva, building 1 ah room 12 zel awm tur niin, hunbi tuk chhunga zawh tum a ni.

School paruk thuam thar hi Rs.8.59 Crore senga thawh tur a ni a, smart class room dah tur a ni.

Pu R. Lalchhanhima, Addl. Secretary, DC & MA chuan lawmthu sawiin inkhawm a khar a ni.