Mizoram Engineering Service Associotion chuan vawiin khan Art & Culture Auditorium, Berawtlang-ah Annual General Conference vawi 30-na an hmang a, Chief Minister Pu Lal Thanhawla chu Khuallian a ni.

Chief Minister chuan kan ram hruaituten khawvelah economy lian ber dawttu nih tuma China nen kan intlansiak naah hmasawnna ruhrel siam nan PMGSY te leh a dang tam takah hma la in, hengah te hian engineer-te chu a pawimawh hmasa ber an nih thu a sawi a. Central sorkarah hmasawnna tur duhsakna zau tak inhawng reng khu a haichhuah dan dapa, hmathlir mumal tak nen, tuchhuan lokal leh zel turte thlenga  chhawr theih tur kan ngaihtuah a hun tawh hle a ni a ti a. Chuvangin kan hnathawh reng reng hi a tha in a tlo tur a ni a, quality kan hlamchhiah tur a ni lovang a ti. Politics lama kan pute an lo lawmlo deuh anih pawhin hna in a tawrh lova, dik taka kan thawk anih phawt chuan huaisen taka kal chhoh mai tura ni tiin, chhelte pawh kan zir tur a ni a ti. Engineer kalkhawmte chu contractor leh supplier-te lei theiha awmlo tura chahin, contractor ten hmanraw dik leh tha an hmang em, an hna quality a tha tawk em tihte hi engineerte mawh anih thu a sawi bawk a. Contract hna hralh thin thu sawilangin, Chief Minister chuan contract hna hralh leitu hian hlawkna tel a duh ve tho avangin sum tlemte senga an thawh thin avangin hna khan a tuar thin a, chuvangin hetiang hi a thlen loh nan engineerte chu a vengtu tur an nih thu a sawi bawk a ni.

Chief Minister chuan engineerte chu tunlai thil thleng thar ber berte hriat tum zel tur leh hemi lama intathriam reng turin a fuih a. Engineering Service Associationa department 3, PWD, PHE leh P&E te chu hnathawh that lama inelna thianghlim siam thin tura chahin, an inkara thawhhona tha zawk a awm theihna tura hmala thin turin a fuih bawk a ni. Pu Hawla chuan sorkar hnathawkte chu sorkar neitu dik tak an nih thu sawiin, sorkarna siamtu ruling party ah rinawm tum loh tur a ni a ti.

MESA ah hian member 350 vel an awm mek a, a din tirh kum 1972 khan member 8 chauh an la awm a ni.An sum dinhmun reportah chuan sum lut zawng zawng chu cheng nuai 5 sing 7 leh sangnga 417 a ni a, hmanral zawng zawng chu  cheng nuai 4 sing 8 sang 4 leh 946 a ni a, balance Rs.90,467 a ni.

Conference hi MESA President Er K Lalsawmvela'n a kaihruai a. Chawhnu lama an rorel zingah MES Rules siamthat, MES Examination Regulation leh Cadre Review te sawihona neih a ni.