Ni hnih chhung awh tur, India hmarchhak State te tana central sorkar Department of Personnel and Training ( Training Division) in a bultum, Administrative Training Institute(ATI), Aizawl in a a buatsaih, Mid Career Interaction between Armed Forces and Civil Services Officers on Drugs Trafficking chu vawiin khan ATI Auditorium ah Chief Minister Pu Lal Thanhawla chuan a hawng.

Hawnna thu a sawiah Chief Minister chuan sipai officer-te leh civil service officer ten ruihhlo drugs chungchang sawiho tura ATI in hetiang programme an buatsaih chu lawmawm a tih thu a sawi a. Hetiang hunah hian a tu a ve ve lam ten an thil tawnhriatte in ngaihthlak saka, inzirtawnna hun atana an hman hian anmahni tan theuh leh khawtlang tan thatpuina a thlen ngei a beiseiawm a ni a ti a. Sipai leh civil officer te in ring tawn taka thawk dunin, ruihhlo tawlhruk khuahkhirhna kawngah nasa takin hma an la dun thei a ni a ti a.Sipai ten Military Civic Action Programme an buatsaih thin ah te hian civil mi ten an thlamuanpui thin hle a ni a ti.

Chief Minister chuan India ram hi ruihhlo siamna, opium nasa taka chingtu ram ‘golden crescent’ an tih Pakistan, Afghanistan leh Iran te leh ‘golden triangle’ an tih ram, Myanmar, Thailand leh Laos te karcheh anih avangin ruihhlo tawlhrukna kawngah nasa taka hman thin anih thu a sawi a. Chuvangin ramri ven thu ah te sipaite hi an pawimawh em em a ni a ti. Ruihhlo hian mimal, chhungkua leh khawtlang a tibuai mai a nilova, a huhova sual khawih pawl a hringchhuak a, politics ah derthawnna a thlen bawk avangin kan zavaia a kan do a tul a ni, Chief Minister chuan a ti.

Inpawlhonaah hian Assam Rifles, BSF leh 57 Mountain Division atanga officers, Mizoram hmun hrang hrang leh Tezpur leh Silchar, Assam atangte, Air Force officers, Silchar leh Shillong atangte, Navy officer, Kolkata atangte in an lokal a. Civil Officer Nagaland leh Meghalaya Jaintia district atang te in an lokal bawk a. Thlawhna a mumal loh avanga lo thleng hman lo leh vawiin lama lo la thleng tur te pawh an awm a ni. Hawnna inkhawm hman lai hian Chief Minister ngenna angin state dang, Nagaland leh Meghalaya aiawh ten an state chhunga ruihhlo tawlhruk hluar dan leh a hmangtu te chungchang ngaih thlak a ni a. Vawiin chawhnu lamah leh naktukah te sawihona neih zel a ni dawn a. Vawiin lam hian Pu Lalbiakmawia Khiangte in Drugs Law chungchang a sawi a; Pu Lalhmunsanga, Excise Dy Commissioner in Drugs Scenario in Mizoram tih sawi bawkin, naktukah Illicit Trafficking of Drugs across the border tih leh Cooperation between Armed Forces & Civil Authorities tih thupui hmangin a sawi leh anga; Pu Ngurchungnunga Sailo, Excise Asst. Commissioner pawhin Identification of Drugs & Concealed Packages tih thupuiah hmanga thusawi bawkin, naktukah Detection, Investigation & Prosecution tih thupui hmangin a sawi leh bawk ang. Thupui hmanga thusawi hi sawihona in a zui nghal zel bawk a ni.

Hawnna inkhawm hi Pu R.Lalvena, Director, ATI in kaihruai a, he huna tel tura beisei mi 40 chuang an nih laiin hawnna inkhawma tel hman te hi mi 37 vel an ni.