356/2026-2027

^{Aizawl the 2nd May 2026 : Vawiin khan Chief Minister Pu Lalduhoma chuan Mizoram Rural Bank Head Office-ah Mizoram Rural Bank Branch Manager Conclave 2026 chu khuallian niin a hmanpui. Pu Prakash Chandra Baror, General Manager, (A&S), SBI Corporate Centre chu khualzahawm a ni.}

Thusawiin Chief Minister chuan, India rama Regional Rural Bank thangduang tak, Mizoram Rural Bank, mizote ta kan nei hi a hlu hle a. In hmasawnna chanchin ka lo hriat hian ka lo lawm thin a ni. CD Ratio nei tha ber pawl Bank in ni reng mai hi a chhuanawm a ni. Bank te CD ratio a san hian an sum dawn khawm te mipuite tan an pe chhuak tam tihna a ni a. Ram hmasawn nan chu chu a pawimawh a ni.

Bank Manager te hi sorkar policy a taka chantirtute in nihna chen a awm a. Kan flagship programme Bana Kaihah phei chuan in ni leh zual a. Kan ram hmasawnna tura tih theih in ngah hle a, kan beisei sang che u a ni.

Kan ramah financial literacy sang zawk mamawhna a nasa a, thingtlang lama kan mipuiten bank an mamawh em em che u a. An tana dawr awlsam leh zangkhai neih a tul bawk a. Heng kan mipuite mamawh phuhru theitu ber tur chu MRB te hi in ni. In lo tih tawh te tha taka chhunzawm zel chungin zau zawka hma la zel turin ka ngen a che u. Nikum chhunga hmasawnna ropui tak in thawhchhuahah ka lawmpui che u a. In tan sorkar hi a ding reng tih hre chungin hmasawn zel i tum ang u, tiin a chah.

Pu Isaac Lalfamkima Sailo, Chief Manager, P & OA chuan kalkhawmte lawmna thu a sawi a, Pi Sheryl L. Vanchhong, Chairman, MRB chuan thu sawiin, sorkar kum kal ta chhunga hma an sawnnate a tarlang a. An conclave a hmanpui avangin Chief Minister chungah lawmthu a sawi bawk.

MRB hi 27.9.1983 ah a ding tan a, Mizoram Rural Bank ah hian Govt of India in share 15% Sponsor Bank SBI in 35% leh Govt of Mizoramin 50% an nei a ni. Regional Office 2 bakah Branch hi 106 an nei tawh a, chung zinga 60 chu thingtlanga awm an ni. Thawktu hi 491 an awm mek.

Tun sorkar kum liam taah khan Deposit Rs. 6526.10 crore an hmu a, an target hi Rs. Crore 682.11 in an khum a, an thanna rate hi 11.26 an ni. An loan pek chhuah zat hi Rs 4129.98 Crore a tling a, an tlin zat tura an bituk (Advances target) hi Rs. crore 300 chuangin an khum a. Nikum chhunga an hlep hi Rs. 152.27 Crore niin, an Credit Deposit ratio hi 63.28 a ni a. Mizoramah an sang ber a ni.

Kum kal ta chhung khan an kum khat sum che vel hian Rs. 10,656. 08 Crore a tling ta a. Branch tinin Rs. 100 Crore kalpui vek anga ngaih theih (100 crore Business per Branch) an ni a. Hetiang nei thei Regional Rural Bank hi India ramah pali chauh an la awm a. Hei hi hmasawnna chhinchhiahtlak tak a ni.

An sum che vel zawng zawng 97.36% hi digital financial transaction-in an kalpui tawh a, NE India-ah an sang ber a, India ram huap chuan pahnihna an ni. Mizoram sorkar flagship programme Bana Kaihah loan 279 an pe chhuak tawh bawk a. Hand holding hnuaia partner bank te hnena dilna lut za zela 59.35 hi MRB ah a lut mek a ni.

Branch ti thate lawmman semna neih a nih hnuah Pu Saibal Kanti Roy, General Manager (Business), MRB chuan lawmthu sawiin inkhawm a khar a ni.