Chief Minister Pu Lal Thanhawla chuan vawiin khan Mizoram State Data Centre, Secretariat Annexe - I Building ami a hawng. Hawnna inkhawm hi Mizoram Legislative Assembly Conference Hall-ah neih a niin Speaker Pu Hiphei, Ministers, Parliamentary Secretaries, MLA leh official thahnem tak an tel a ni.

Chief Minister chuan Information Technology-ah hian khawvel hi a tlan chak hle a, inelna pawh a sang a, hemi-a kan tel chhoh zel loh chuan kan chhehvel amite aiin helamah hian kan hnufual zawk dawn a ni a ti. Sorkar tha (Good Governance) siam nan a tangkai hle a, Mizoram sorkar pawhin nasa zawka hman tangkai tumin hma a la mek zel a, department hrang hrangah sorkarin mipui hnena service tha leh rang taka a pek theihna turin theihtawp a chhuah a ni. I.T. tangkai taka hmang department zingah Taxation Department hlawhtlinna hmuh tawh a ni a, on-line hmanga road permit leh VAT pek theihna siam ringawt pawh hi sumdawngten an chhawr tangkaiin chhiah lakluh pawhin a pun phah nasa hle a ni Chief Minister chuan a ti.

Sorkar laipuiin India State Data Centre Project a rawn siam zarzova vawiin State Data Centre kan nei ve thei hi a ropuiin a lawmawm takzet a ni tiin SDC hian service hrang hrang – Government to Government (G2G), Government to Citizen (G2C) leh Government to Business (G2B) te a pe thei dawn a, hei hi mipuite tan a tangkai ngei a beisei thu a sawi.

Khual zahawm Pu Lal Thanzara, Information & Communication Technology Minister chuan thu sawiin, ICT Department-in nasa takin hma a la a, Software Export lama hma kan sawn theih nan Software Technology Park of India pawh din turin ruahmanna peih fel thawkhat tawh a ni a ti. Thalai lehkhathiamten kan ram chhung ngeiah Information Technology hmangin hna tha tak tak an la thawk ngei ang tih a beisei thu Pu Lal Thanzara chuan a sawi a ni.

Pu C.Lalhmachhuana, Secretary, ICT Department – in lawmna thu sawiin Pu Lalthlamuana Chief Infomatic Officer, ICT –in Technical Report a pe. He project hian a tum ber chu hengte hi a ni.

1. State of the Art Data Centre thatak siam leh telecommunication nena inthlun zawmna tha tak neih tir.

2. Sorkar document pawimawh zawng zawng him tak leh tha taka vawn thatna hmun siam.

3. Sorkar Department hrang hrangin services hrang hrang (G2G, G2C leh G2B) te awlsam taka an pek chhuah theihna tura infrastructure siam sak.

4. Sorkar Department-ten mipui hnenah rang tak, tha tak leh him taka services hrang hrang awlsam taka an pek chhuah theihna tura hmun siamsak.

He project hi Approved Project Cost chu cheng vaibelchhe 30.88 ruahman a ni a, hemi atanga cheng vaibelchhe 11.75 hi Grant-in-Aid atanga hmuh tur a ni a, cheng vaibelchhe 19.13 hi Additional Central Assistance atanga hmuh tur a ni. Project tihpuitlin nan hian Consultant Wipro rawih an ni.