3795/2024-2025

Dated the 14th January 2025: Vawiin khan Chief Minister Pu Lalduhoma chuan Art & Culture Auditorium, Beraw tlanga buatsaih National Institute of Technology Mizoram 8th Convocation chu khuallian niin a hmanpui.

Chief Minister chuan, NIT chu India rama zirna in tha bik kan neih te zinga mi a ni a, he zirna ina zir phak nih pawh hi a hlu hle. Vawiina NIT Mizoram atanga hlawhtlinna chang thar zirlai 147 te ka lawmpui a, in nu leh pate pawh ka lawmpui a, India ramin Engineer tam tak kan neih belh bawk. A tir atanga vawiin thlenga zirlai naupang tha tak tak chher chhuaktu NIT Mizorama thawktu zawng zawngte chungah pawh kan lawm a ni.

Khawvelin resource a neih ropui ber chu human resource hi a ni a. Human resource te hi hman tlak taka kan buatsaih chuan matheilovin ramin hma a sawn thin. Human resource kan buatsaihna hmun ber chu kan zirna in te an ni a. NIT Mizoram pawh hian engineer tha chher chhuah kawngah mawhphurhna pawimawh tak a chelh. Mizoram leh India ram tana engineer tha chher chhuaktu ni turin kan duh. Chuvang chuan, thawktute pawh a tling leh tlak (qualify) ngei zel ni se, politic boruak tha lo engmah inrawlh lo se kan duh a. In thiltih tinrengah hei hi min lo hriatsak reng dawn nia, tiin a chah.

Ka kaihhruai sorkar hian NIT Mizoram pawimawhzia a hria a, Lengpuia campus sak meka harsatna kan tawh Forest Clearance pawh rang takin kan umzui. Sawrkar laipuiah ziakin kan thlen a, hmaichhanah kan sawipui bawk a. Kan dilna te ngaithlain hman ni deuh khan Forest Advisory Committee an lo kal a, Penal CA leh penal NPV kan chawi tur Rs. 22.45 crore kha Rs. 3.8 crore ah min tihhniamsak ta a ni. Board of Governor lamah hei hi kan thawn a, an rawn chinfel thuai kan beisei. Hei hi kan chin fel chuan a sak chhunzawm hna hi rang takin kan thawk zui ang, a ti bawk.

Chief Minister hian Gold Medal dawng te hnenah certificate leh medal a hlan a. Under Graduate branch panga zinga Civil Engineering branch-a Gold Medal dawngtu hi Remruatfela a ni.

8th NIT Mizoram Convocation ah hian Pu Harshavardhan Neotia, Chairman, Board of Governor pawhin thu a sawi a. NIT Mizoram chu India rama 5G Case Laboratory hmang thei tlem te zinga mi a ni a. IIT Madras leh IIM Visakhapatnam te nen inremna neiin kan zirlai pass chhuakten IIT Madras ah direct-in Ph. D an tizui thei a, heta final year an zir lai atangin IIM Visakhapatnam ah MBA zir zawm turin an inziak lut thei bawk. NIRF ranking ah 101-150 huangah kan awm mek a. Reiloteah hei aia sang zawkah hian kan chho ngei dawn a ni, a ti.

8th Convocation ah hian kum 2020 batch B. Tech degree, kum 2022 batch M. Tech degree leh Ph. D  degree te hlan a ni a. B. Tech branch teah hian Civil Engineer degree mi 28, Computer Science & Engineering degree mi 25, Electronics & Communication Engineering degree mi 25, Electrical & Electronics Engineering degree mi 20 leh Mechanical Engineering degree mi 18 te pek an ni a. M. Tech degree hi mi 3 hnenah hlan niin Ph. D degree hi branch hrang hrang 7 atangin mi 28 te pek an ni bawk. Vawiina degree hmu thar zawng zawng te hi an vaiin mi 147 an ni. NIT Mizoramah hian Under Graduate course  chi nga, Post Graduate course chi li leh Ph.D degree course te a awm mek.

NIT Mizoram hi kum 2009 a sorkar laipuiin NIT sawm a din thar te zinga mi niin, July 2010 khan NIT Nagpur campus uapna hnuaiah zirna bul tan a ni a. An campus tur hi Lengpuiah sak niin engemaw chen hna thawh tawh a ni. Forest clearance lamah chin fel ngai a awm avangin hna hi chawlh rih a ni a, tunah hian Chaltlangah building 11 luahin zirna an kalpui mek a. Zirlaite awmna tur hostel building 6 dang an luah hawh tel bawk.

Prof. S. Sundar chu Director niin Prof. Ajmal Koya chu Registrar a ni.