Kum 1984 January ni 12-a Aizawl Branch ni tura din National Insurance Company Limited, tunhnaia Divisiona hlankai thar chu Zodin Bus Stand bula Pi Chawithangi building chhawng khatnaah vawiin khan Chief Minister Pu Lal Thanhawla chuan he divisional office thar chu a hawng.

Chief Minister chuan insurance companya kan thil hlu neihte kan insure thinah a claim lamah harsatna kan tawh thin avangin Mizo ten insurance company te hi kan hmang tangkai vak thin loa a hriat thu a sawi a. Heng harsatna kan tawh thin hi a claim thuah Silchara chinfel ngaite ani thin a, tunah chuan kan khawbu zawl ngeiah kan chinfel theih tawh dawn avangin hmasawnna pakhat a ni a, a lawmawm tak zet a ni a ti. National Insurance Company Ltd ah hian kan ran vulhte mai bakah kan thlai te pawh a insure theih hi keini tan chuan hamthatna tha tak a ni a ti a. Mizo te hian insurance company te hi tangkai taka hmang thin turin Chief Minister chuan mipuite a ngen nghal bawk a. Tunhnaia Prime Minister Narendra Modi in thingtlang mi ten bank account nei vek tura a tih chu keimahni hamthatna vek tur a ni a, a phurawm hle a ni Chief Minister chuan a ti bawk.

National Insurance Company Ltd hi central sorkar hnuaia awm a ni a. India rama Life Insurance tihloh, Insurance Company 27 zinga a lian ber dawttu a ni a. Mizoramah branch office anga kum 30 chuang hna an thawh hnuin vawiin khan Divisional Officeah hlankai a ni a. India hmarchhak bialah Divisional Office 12-na a ni. Kum 2014-15 fiscal year chhung hian premium target Rs.16 Crores thawhchhuah beisei a ni a.He divisional office bakah hian kumin chhungin business centre Bawngkawn, Champhai, Lunglei leh Kolasibah te hawn tum a ni.Hnathawktu turte pawh a theih chin chinah ram leilung fate lak tum a ni.

Vawiin hawnna inkhawmah hian K.P.Brahma, Director & General Manager, Kolkata, J.P.Das, Chief Regional Manager, Guwahati leh A.Rajkumar, Chief Manager, Guwahati ten an rawn hmanpui a. Divisional Office thar enkawl tur hian Senior Manager John T.Rymbai chu Shillong atangin rawn dah a ni a, tunah hian hnathawktu mi 10 chuang an awm a ni.