Chief Minister Pu Lal Thanhawla chuan vawiin khan Aijal Club-ah Mizoram University Department of Social Work buatsaih, National Seminar on ‘Research on Child Protection in North East India’ a hawng a, Dr. Henry Z.Pachuau, Assistant Professor, Deptt. of Social Work, MZU ziah lehkhabu 5 a tlangzarh nghal.

Chief Minister chuan Mizote zingah naupangte hi kan pi leh pu atangin kan lo dah pawimawh tawklo thin a, hei hi hnam mawl zia a ni a ti a. Naupangte hi nakina kan rohlu, kan ‘investment’ an ni tih hrelo tam tak kan awm a, fa nei ringawt a, enkawlna tha pek nachang hrelo leh peihlo tam tak kan awm a ni a ti a. Chuvangin hetiang seminar Mizoram University department of Social Sciences in a buatsaih hi a pawimawh em em a ni a ti.

Chief Minister chuan thawhchhuah nei silova fa neih ngawt te hi harsatna leh nupa inthenna min thlentu a ni thei a, naupang awmtha duhlo kan tihte hi nu leh pa kara seilian nilo, chhungkaw keh atanga seilian an ni deuh zel a ni a ti a. Chuvangin naupangte hi ei tur tha leh zirtirna tha pek hi nu leh pa mawh a ni a, tihluihna in hna kan thawh tir tur a nilo (child labour) a ti. Naupangte hian naupan lai hun nuam ti taka an hman hi an chanvo a ni a, chutiang kan siam sak theilo anih chuan nu leh pa tlak kan nilo tihna a ni a ti. Inkaihhruaina diklo leh sual tinreng lakah naupangte venhim leh humhalhna kawngah leh an chanvo dik tak peknaah te tlawmngai pawl te, kohhran te leh sorkar te hi kan tan tlan a pawimawh tak zet a ni a ti.

Chief Minister-in lehkhabu a tlangzarh te hi naupangte venhim leh humhalh lampang an ni a. A tlangzarhte chu Vulnerable Children of Tribal Communities in North East India, Children under Institutional Care in North East India, Pocket Stories of a Social Worker, Silent Scream tih leh Hriatloh Au Rawl tihte an ni.

Prof. Srinibas Pathi, Dean of School of Social Sciences, MZU & President of the Seminar chuan India ram hi naupang tamna ber ram a ni tiin, khawvel hi nuam tak leh awmze nei taka an hman theihna tur hi keini puitlingte hian kan buatsaih sak tur a ni a ti a. Chanvo leh Dikna an neihte hi danin a phut ang zela venhim leh humhalh hi kan mawhphurhna theuh a ni a ti. Chuvangin hlawhtlinna kan hmuhna turin tan tlan hi kan tih tur a ni a ti.

Khualzahawm Prof Lianzela, Finance Officer & Acting Vice Chancellor, MZU pawhin thusawiin, level hrang hrangah naupangte humhalh chungchangah research nei thin mahila, data kimchang hmuh tur a tamlo hle a ni a ti a. Naupangte venhim leh humhalh kawngah kan hriatna kan tihzauh a pawimawh hle a ni a ti a. Chanvo an neihte humhalh sak a tulzia hriain, UNO pawhin 20th November 1989 atangin ‘Child Protection Rights Day’ alo hmang thin a ni a ti.

Pi Laldikkimi, Dy Director & Secretary, Mizoram Child Protection Society, Social Welfare Department in powerpoint hmangin child protection chungchang a sawifiah bawk a. Naupangte venhim leh humhalh kawnga kaihruaitu dan ‘Integrated Child Protection Scheme’ chu hmarchhak state ah kalpui vek anih thu leh Mizoram chu a ti tha ber kan ni a ti a. Child protection tih hian thil tam tak a kawh thu sawiin, a tlangpuiin naupangte chaklohna (vulnerability) tih tlem, ngaihsak, duat, enkawlna dik leh tha tha pek, tharum leh tihduhdahna laka ven leh a dang tam tak a awm thu a sawi a, a literature erawh a tamlo hle a ni a ti.

Hawnna inkhawm hi Dr. Kanagraj Easwaran, Associate Professor & Head, Deptt. of Social Work, MZU in a kaihruai a. Chawhnu lamah seminar hi neih a ni.