Presbyterian Church of India (PCI) buatsaih, Two Day Regional Workshop on Disaster Management, Synod Conference Centre, Sikulpuikawn Aizawl a huaihawt chu vawiin khan Chief Minister Pu Lal Thanhawla’n a hawng.

Chief Minister chuan khuarel chhiatna hi mihring ten dang theilo mah ila, alo hmachhawn dan te, chhanchhuah hna te leh chhiatrupna lo thlen a, lo inrelbawl dan zir lawk a (disaster management), kan thiam chuan nunna leh bungrua tam tak kan hum thei a ni, a ti a. India Hmarchhak bial phei chu lirnghin duhna hmun- seismic zone 5 a awm, tlangram chhengchhe tak tak anih hlawm bawk avangin khuanurel chhiatna hi kan tuar nat bik theih avangin, mipui hnena zirtirna (awareness) tam tawk kan neih angai a ni, a ti a Hetiang lam hawia Presbyterian Church of India in workshop a buatsaih chu a lawmawm tak meuh a ni, a ti.

Disater Management han tih hian zau tak a huam a ni tiin, Chief Minister chuan sik leh sa hriat lawk te, warning ang te, zawn leh chhanchhuah hna te, siam that leh chhawmdawl te a tel a ni, a ti a. Hengte bakah mi chi hrang hrang scientists te, roreltute, tlawmngai pawlte leh ami nawlpuite a huap vek a ni, a ti. Chuvangin hetiang hunah chuan inpawhna tha leh lungrualna a pawimawh hle a ni, a ti.

Khuarel chhiatna thlen thulhah central sorkar pawhin a chhawmdawlna lam ai maha lo hmachhawn tura lo inpuahchah lawkte, invenna leh chhiatna tlem thei ang ber a awm theih dan te a ngaihpawimawh tawh zawk a ni tiin, Chief Minister chuan kum 2005 khan Disaster Management Act a siam a ni, a ti a. Ram pum huapin Prime Minister kaihhruaina hnuaiah National Disaster Management Authority te, State levelah Chief Minister Chairmanna hnuaiah State Disaster Management Authority leh District levelah DC te kaihhruaina District Disaster Management Authority te siam a nih thu a sawi a. A pawimawh ber zawk chu khawtlang mipuite inpuahchahna a ni tiin, Chief Minister chuan khaw tinah Disaster Management Committee leh Disaster Management Team din a pawimawh hle a ni, a ti.

Hawnna inkhawm hi Rev. S.I. Iawphniaw, Moderator, PCI in a kaihruai a. Vawiin leh naktuk hian thupui 3 - ‘Concept of Disaster and Types of Disaster in N.E. India ; an overview ‘ te, ‘Disaster ; It’s Causes, Effects and Carbon Trading’ tih leh ‘ Role and Function of the Local Community in Disaster Management’tih te zirhona neih a ni ang a. Mithiam, Resource Persons Dr. Lalrokima Chenkual, ATI, Aizawl, Satyajit Das, Chief Zonal Officer, CASA, Kolkata leh Dr. Robert S Halliday, Co-ordination, Synfo, Mizoram P.C. Synod ten zirtirna an pe ang.

Workshop a tel tur hian Mizoram chhung atang bakah Meghalaya leh Manipur atang te in chhimtu an rawn tel a ni.