No.7592/2020-2021
Prime Minister Pu Narendra Modi kaihhruaiin nimin (20.2.2021) khan NITI Aayog Governing Council Meeting vawi rukna chu virtual-a neih a ni. State leh Union Territory zawng zawngte an state hotu Chief Minister leh Lt. Governor te telin, Mizoram Chief Minister Pu Zoramthanga pawh he hunah hian a tel a, Mizoram mamawh hrang hrangte a thlen a ni.
Tun tum NITI Aayog Governing Council meeting agenda zingah India ram chu thil siamchhuahna hmunpui a siam te, agriculture kalphung sawi danglam a tihhmasawn te, mihring thiamna leh theihna tihhmasawn te, hriselna chungchang leh hmasawnna rualkhai zawk neih na tura grassroot level a service delivery tihhmasawn te a tel a ni.
Chief Minister Pu Zoramthanga'n Mizoram hmalakna leh mamawhte a sawi zingah Centrally Sponsored Scheme (CSS) leh Central Sector Scheme hnuaia sum hmuh te chu sawrkar laipui leh state sawrkar sum insem dan chu state harsa zawkte tan a phurritthlak thin avangin ngaihtuah nawn leh ni se a ti a.
Oil palm chingtute harsatna tarlangin company ten an kharchhawn sakna rate hniam lutuk chu ennawn theih ni se a ti a. Tlangram lo neih atanga lo hmun nghet neia inthlak chungchanga NITI Aayog hnuaia working group pakhatin report a lo siam tawh zulzuiin Mizorama tlangram lo neih bansan a, lo hmun nghet neia eizawnna inlet tura hmalakna atan sawrkar laipui puihna mamawh a nih dan te sawi.
Chief Minister chuan mipuiin hriselna tha zawk an neih theih nan thingtlang hmun hla zawk tam taka Sub-centre mamawhna a nasat zia leh chumi atan chuan hmalak sak turin Prime Minister chu a ngen a. NHM hnuaia sum hmuhah indaihlohna a awm thu te, IDSP thuam that a pawimawh thu te thlen in, ZMC chu regional medical college a hlankai a nih theih nan hma lak sak turin a thlen bawk.
Digital connectivity a la thatloh thu te thlenin Chief Minister chuan sawrkar laipui hmalakna kal mek Bharat Net chu Mizorama kalpui thuai turin a thlen a. Act East Policy chungchangah hmalak thuai a pawimawh thu te a tarlang bawk a. Mizoram chhunga sumdawnna din thar a kalpui duhte tan kalphung awlsam leh khirh khan lo zawk siama hmalak mek a nih dan te tarlangin, sumdawnna kawngpui pawimawh tur Kaladan Multi Modal Transit Transport Project chu Myanmar lamin an ram chhunga Zorinpui atanga Paletwa inkar kawng siam tur an la thawh ve loh thu leh, hemi chungchangah hian Prime Minister chu hmalak sak turin a sawm a. Bamboo development atana mamawhna leh a bik takin bamboo link road atana sum mamawhna te a thlen bawk.
Chief Minister hi Chief Secretary Pu Lalnunmawia Chuaungo, Addl. Chief Secretary Pu JC Ramthanga leh Planning Commissioner & Secretary Dr. C. Vanlalramsanga ten an tawiawm a ni.
