Chief Minister Pu Zoramthanga chuan nimin (January ni 21, 2020) khan NITI Aayog Vice Chairman Dr. Rajiv Kumar chu New Delhi a office ah kawmin Mizoram hmasawnna tur thu pawimawh tak tak a sawipui a. Mizoram sawrkarin Aizawl khawpui chhunga public transportation indaihlohna tiziaawm tura Aerial Cable Car siam tura rawtna a lo thlen tawh chu NITI Aayog in ngun taka a zirchian hnu ah siam theih ngei nia an hmuh zia leh sum mamawh tur pawh ruahmanna siam nghal a nih thu NITI Aayog Vice Chairman chuan Chief Minister hi a lo a hrilh a ni.

Aizawl khawpui chhunga public transport hman lai mek bus leh taxi service in mipui mamawhna a phuhruk zawh tawk loh avang leh mahni leh mahni inchawmzo thei tur public transport dang, kawngpui titawt belhchhah si lo tur ruahmanna Mizoram sawrkar chuan a lo siam tawh ah Cable Car service khawpui chhunga siamna tur NITI Aayog ah a lo thlen tawh a. Ruahmanna ang chuan Cable car hi Thuampui atanga Solomon's Temple (East-West Corridor) a kal leh Durtlang atanga Kulikawn (North-South Corridor) kal awm tura tih a ni. NITI Aayog Vice-Chairman chuan Ministry hrang hrang ko khawmin he rawtna hi a tihlawhtlin theih dan tur sawiho fel a nih tawh thu te, sum mamawh tur pawh Ministry pathum Secretary ten a lakkhawm dan tur ngaihtuahin ruahmanna an siam tawh thu Pu Zoramthanga chu nimin an inkawmnaah hian a hrilh.

Cable car service siam hi a remchan dan leh tih theih dan tur zirchianna (feasibility study) lo neih tawh niin, a final report duang turin NITI Aayog in a rawih Ernst and Young a mithiamte chu karleh hian Mizoramah an lo kal nghal tur thu NITI Aayog Vice Chairman chuan a sawi bawk.

Heng bakah hian nimin an inkawmnaah hian Bamboo link road chungchang sawi a ni a. 10% Gross Budgetary Scheme hnuaia hmarchhak state te tana sum dah, khawih chet siloh chu a rang lama hmasawnna hna thawh theihna tura release a nih theih nan hma la turin Chief Minister chuan NITI Aayog Vice Chairman chu a ngen a ni.

He an inkawmnaah hian Chief Minister hi Planning Board Vice-Chairman Pu H. Rammawi, Planning Secretary Dr. Vanlalramsanga, Horticulture Department Director Dr. Elizabeth Saipari leh official dangten an tawiawm a ni.