Chief Minister Pu Lal Thanhawla chuan vawiin khan I&PR Auditorium-ah NLUP Implementing Board (NIB) hnuaia Mizoram Environment & Forests Consultative Forum (MEFCOF) telh ve a nih bul tanna a hawng.

Chief Minister chuan NLUP hmanga hmalakna thenkhat zinga ramngaw, nungcha leh lui hna humhalh kawnga chak zawk leh changtlung zawka hmalak anih theih nan MEFCOF chu NIB a telh ve a nih thu a sawi a. MEFCOF thil tum ber, ramngaw, nungcha leh  lui hna kang chat mek humhalh hi thil pawimawh tak a ni a, YMA pawhina hmalakna pakhat a neih a ni a ti a. An hmalakna hi a lawmawm tak zet a ni a ti. Pu Hawla chuan khawvelin a buaipui ber boruak lum chho zel (global warming) hian kan chhehvel boruak (environment) a tichhe mek tih sawiin, engtinnge kan awm zel dawn tih ngaihtuah a tul a. He mi siam that nan hian NLUP kan kalpui a, khawvelin a buaipui ber siam thatna hi NLUP hian a keng tel a ni a ti a. Tlangram lo neih kan bansan hunah chuan ramngaw chereu mek chu a rawn tha leh anga, sik leh sa lo tha leh bawkin tui hna te alo pung thei dawn a ni a ti.

Chief Minister chuan Pathianin mal min sawm a duh a, mahse thuawih tak leh tih nuam taka kan awm hmasak min phut a ni tiin, NLUP hian milian leh hausa a zawng loa, mirethei, chanhai, pachhia leh chhumchhia te tan a ni a, thuawih leh rinawmna, dikna leh taimakna nen an kalpui a pawimawh a ni a ti. NLUP kalpui tur hian central sorkar-in kan dil aia tam daih min pe hi Pathian hnathawh vang chauh a ni a ti a. UNO peng pali pawhin kan sawm ni miah loin an rawn tel ve a, tunah hian Aizawlah an office tur pawh an luah tawh a ni a ti a. Tata Trust Fund pawhin an mahni thua rawn tel ve bawkin Rs.8 Crore in bul an rawn tan bawk a ni a ti. Hengte hi a hmang tangkai tur chu keimahni, a leilung fate kan ni a ti a. Chuvangin intodelh leh hriselna tha kan neih theihnan kan leilung leh nungcha humhalhna kawngah kan tan tlan hle angai a ni a ti.

Khualzahawm NIB Chairman Pu JH Rothuama, MLA chuan thil tha ngaihtuah pawl an awm hi a lawmawm hle a ni a ti a.Ram enkawlnaah mikhual angin kan awm a, kan chhehvela hun rei tak lo awm tawh thing leh mau, nungchate kan ti mang a, kan tuihna te a kangchah phah nasa a ni a ti a. Hengte siam tha tur leh thei thlenga humhalh hna thawk tura MEFCOF in hma a rawn la chho hi a lawmawm tak zet a ni a ti.

MEFCOF Patron Pi Lal Riliani chuan kan rama ramngaw leh nungcha chereu mek humhalh duhtu leh a veitu mai nilo, a taka kalpuitu MEFCOF chu fakawm a tihthu a sawi a.An hmalakna hi zau zawka mipuiten an hriat a, a pawimawhna hmun tinah tlangaupui a tul a ni a ti a.Heng humhalh ngaite kan kalpui hian mihring nun a humhalh tel a ni tih kan hriat a tul a, chuvangin kan nun hi hrisel taka kan hman theinan min hrisello theitu zuk leh hmuamah i fihlim theuh ang u a ti.

MEFCOF hi kum 2004 khan mi thahnemngaiten dinin, ramngaw humhalh hna an kalpui a. Heng an ram humhalhte hi khaw hrang hrangah hmun 46 ah an kalpui mek a, heng ram humhalhte hi ‘Zotheihuan’ tiin an vuah a ni. Tunah hian ramngaw bakah thei chi hrang hrang leh nungcha, tuihna leh lui sa te humhalh hna an kalpui a ni. Heng ram humhalhte enkawltu tur hian khawtinah Coordination Committee dinin, VC, YMA, MUP leh MHIP te hruaitute dah an ni a. Zotheihuan zawng zawng belhkhawm hi 1890 sq.km a zau a ni.

Hawnna inkhawm hi MEFCOF President Pu V.L.Bela’n a kaihruai a. Chawhnu session-ah assembly nei zuiin kum 2015-17 chhunga an hruaitu tur thlanna an nei bawk a ni.

Attachment

  • Loading attachment...