Chief Minister Pu Lal Thanhawla chuan vawiin khan Oil Palm herna tur khawl lungphum Kolasib District chhunga Bukvannei khuaah a phum.

Lungphum phumna inkhawm Kolasib Diakkawn Community Hall-a neihah Chief Minister chuan Mizorama oil palm chin hi sorkar hmasa ina alo bul tan hi chhunzawm tlak ani tih hriain sorkar chuan a chhunzawmin, NLUP hnuaiah pawh kalpui a ni a ti a. A hriak her chhuak tura Company lian leh hausa Godrej Agrovet-in hmala a, a khawl bunna tur lungphum phumnaa an hotute leh Central Agriculture Ministry atanga hotu lokalte hnenah lawmthu a sawi a. Hetianga kan ram economy chawikang tura ke min pen puinaah lawmthu a sawi bawk a ni.

Chief Minister chuan Mizo ten tam kan tih hi a tam tawk thinlo a ni tiin, tuna hriak herna tur khawlin a mamawh zat tur a neih reng theihna turin, oil palm chingtu ten nasa taka tan an lak angai dawn a ni a ti a.Chuvangin a hlawhtlinna tur chuan a chingtute kutah a awm a ni a ti. Oil Palm chingtu huan nei 20 awmna ah chuan link road te pawh a tul ang zela siam a ni ang a ti a. Loneitute taimakna hi cho chhuah kan tum a ni a ti. Vawiina a lungphum phumnaa sorkar programme tipuitling tura mi thahnem tak an kal chu a lawmawm hle a ni a ti.

Hawnna inkhawma khualzahawm, Pu H.Liansailova, Agriculture Minister chuan loneitute tharchhuah, sawngbawl ngaite sawngbawl tur sorkarin khawl a bunte hi anih tur anga kalpui anih theih nan a mamawh tur ang, eng thlai pawh nise, hneh taka chawm reng anih theihna turin tha thlah miah lova loneitu ten tan an lak mar reng angai dawn a ni a ti a.Khawlin a mamawh tur thlai, oil palm a ni emaw, sapthei a ni emaw, lakhuihthei a ni emaw chat lak lova chawm reng thei turin hmalak a tul dawn a ni a ti. Chutilochu khawlte hi a tawl mai ang tih a hlauhawm a ni a ti. Sorkar chuan kuthnathawktute hamthatna tura khawl a bunte hi a taka hman tangkaia, tihpuitlin theih hi a duh ber a ni a ti. NLUP dawngtu te hnenah 2nd leh 3rd instalment pek turte pawh sum a awm sa vek a, mahse endik hmasak loh chuan pek chhuah a ngam awm loh a ni a ti a. Loneitute chu tan la sauh sauh tura sawmin a ngen a ni.

Oil Palm herna tur khawl hi kum thar 2013 June thla hma ngeia bun fel tum anih thu Godrej Agrovet Pvt Ltd Executie Vice President (OPP & OB) R.R.Govindran chuan a sawi a.Oil Palm khawl atang hian a chingtute bakah chhungkaw 600 vel in hlawkpui thei tura beisei a ni a. Godrej Comapny hotu chuan oil palm chi nan hian ram hectare 6500 vel mamawh tur ang chhut a ni a ti.Kum 2012-13 chhung hia Mamit leh Kolasib district atangin oil palm 1363 metric tonne tharchhuah theih beisei ani a, a sum zawng chuan Rs. 70 lakhs vel a ni.

Lungphum phumna inkhawm hi Serlui bialtu MLA Pu K.Lalrinthanga’n a kaihruai a. Godrej hotute bakah, Central Agriculture Ministry atangin Dr.A.P.Singh, Dy Commissioner leh officer dang, Mizoram State Planning Board Member & Secretary Pu P.L.Thanga, Kolasib DC Pi Niharika Rai leh mi pawimawh thahnem tak an tel a ni

Attachment

  • Loading attachment...