United States of America (USA) a thuthmun nei, Billy Graham a fapa Franklin Grahama enkawl ‘Operation Christmas Child of the Samaritan Purse’ in a Africa leh Asia a kristian naupang sunday school kai thin te hnena an thawn thin chu OCCSP of Mizoram State kaihhruaina hnuaiah vawiin khan Chief Minister Pu Lal Thanhawla chuan a chenna Bungalow a Banquet Hall-ah Zarkawt Presbyterian sunday school naupang 100 hnenah leh Mualpuia Salvation Army enkawl Muanna In naupang 27 te hnenah a sem.

Heng thilthlawn pek hi American naupang ten naupanglawm athar diai, ramdanga kristian naupangte hnena pek tura bawma (samaritan purse) an dah, an kohhran kaltlanga an thawhkhawmte a ni a. Bawm chhungah hian inanglo thil chi hrang hrang leh a thawhtu lehkha thawnte a awm a, Samaritan Purse hian lo la khawmin an thawn darh ta thin a ni. Vawiina sem tak te hi Kolkata thlenga lawng a rawn thlen man chu Rs. 2 Crore a ni a, Kolkata atang hian truck trip 3 a rawn thawn lehin, Rs. 8 lakhs sen leh a ni.

Chief Minister chuan heng thil thlawnpek thawn anihna chhan hi hria a, malsawmna kan dawnte hi midangte hnena malsawmna kan pek ve theihna tura chona a ni a ti a. Dawngtu kan nih angin pechhuaktu nih ve tum turin naupang kalkhawmte chu a fuih a. Heng thil buaipuite hi Pathian tan zel a ni a, Pathian malsawmna pawh an dawn ngei zel a beisei thu a sawi bawk a ni. He pawla Chief Patron nihna an pek angin theihtawp chhuahpui zel a inhuam thu a sawi bawk a ni.

Operation Christmas Child of the Samaritan Purse of Mizoram State a National Representative Dr.C. Dothanga chuan Samaritan Purse of USA in India khawpui zawkte a Gospel Mission India kaltlanga an lokalpui thin chu nasa taka tihchingpen thin anih avang leh, pastor ten an lo eiruk bawk thin avanga an thuneihna chhuhsak a nih thu a sawi a. Tunah hian hmarchhak state Mizoram, Meghalaya leh Nagalandah te Cooperative Evangelical Mission hmalaknain chhunzawm a ni a ti. Samaritan Purse hian miretheite chauh tana an tih thin anih thu sawiin, tunah chuan sunday school kai zawng zawngte hnenah, kohhran (denomination) bik thliar lova pek vek ani a ti.

He hunah hian Pu P.C. Lalthanliana chu sawm ve niin khualzahawm a ni a. Inkhawm hi Nl.T. Lalhmachhuani @ Mimi Faith Ministries in a kaihruai a ni.