Chief Minister Pu Lal Thanhawla chuan Power & Electricity Engineering Officers’ Association Annual General Conference vawi 12-na Aijal Club-a neih chu vawiin khan a hmanpui.

Chief Minister chuan Engineer rual kalkhawmte chu mithiam an nih angin, Mizoram leilung hausakna, natural gas hmuhchhuah mek atanga power siam dan turah hmathlir nei turin a fuih a.Ram pum thil tum, ‘kum 2012 ah mi zawng zawngin power neih’ tih chu kan puitlin thei ang em, a ti a. Hnathawktu contractor-te hna chaklo lutuk thin chu pawi a tih thu sawiin, heti chunga an mawh a ni tih hria a, engineer ten chunglam thu nghak lova an tawiawm mai thin chu a lawmawm hle a ni a ti a. Sorkar hnathawk te hian mahni hna piahlamah midangte hna hriatpui hi a tul a ni tiin, kan that tlanna turah chuan in tawiawm tlang tur kan ni a ti. Ram tereuhte a awm kan nih angin, kan inhretawn vek a, engmah hi a zep tak tak theih loh a ni a ti.

Chief Minister chuan kan ramah thiam leh hria inti, mahse thiam leh hre ziktluak tak tak silo tam tak te hian, chanchinbu ah thu te ziakin, mipui rilru an kaihruai nasa hle thin a ni tiin, mithiam nangni ang te hian mipui te thudik hrilh theitu in ni a ti a, tan la turin engineer-te chu a fuih a ni.Power renchem chungchangah Chief Minister chuan State Designated Agency hmalakna te chu fakawm a tih thu a sawi a.Central atanga sum lokalte chu a hman danah state dangte entawn tlaka hna thawk turin engineer-te chu a chah a. Central-ah duhsakna haichhuah tur tam tak awmte hi DPR buatsaih chungchangah kan hnufum thin avanga kan nih tur ang kan ni phalo thin chu pawi a tih thu a sawi a. Bangladesh a Prime Minister hnung a zui tuma Bangladesh hotuten Prime Minister hnenah power lei an mamawh thu an sawi, a chhanna ah, Mizoram in power a siam chhuah theih zawng zawng 4,500 MW atanga ala lei theih tur thu a sawi chu Chief Minister chuan a sawichhuak a bawk a ni.

Power Engineer ten P & E Secretary atana Engineer dah an dilna chu Chief Minister chuan PWD ah enchhin anih tawh thu sawiin, chuti teh chiama a thatna a hmuh loh thu a sawi a. A post chelhtu, a mihringa zir anihzia thu a sawi bawk a. Secretary ten Director hna an chelhkawp thinte hi tih tawp an duhzia te pawh sawiin, Education department Director hna pawimawh em em pawh a chelhtu tur mi tling leh tha an hmu lo a ni a ti. Sorkar motor entitle 20 zinga 10 chauh pek a ni chu Chief Minister chuan an nei vek tur a ni a ti a. Field Officer ten hna tha zawka an thawh theih nan motor an mamawh hle a ni tih sorkarin a hriat thu sawi bawkin, Pu Lal Thanhawla chuan ngaihtuah a tul hle a ni a ti. Post ruak hnawhkhah chungchangah Chief Minister chuan sum harsatna avanga puitlin theih anih loh thu a sawi a. Hetih lai hian JE posts 46 ruakah 3 chu hnawhkah tura remtih anih thu a sawilang bawk.

Chief Minister hian P & E buatsaih ‘Kawlpetha’ tih journal a tlangzarh bawk a. Conference hi PEOA President Er.Jolly Newman in a kaihruai a ni.

Power & Electricity Officers’ Associationah hian member 127 an awm a, chung zinga 106 chu Electrical Wing an ni a, abak zawng 21 chu Civil Wing an ni. Association hian sum kawllai Cheng 63,832.00 an nei bawk a ni.