Chief Minister Pu Lal Thanhawla chuan vawiin khan St.Paul’s Higher Secondary School zialai naupang ten kumin 2012 a Matric(HSLC) leh Higher Secondary (HSSLC) Exam-a ti tha zual, rank holder te chawimawina-Proficiency Awards - School Auditorium, Tlangnuam-a a buatsaih chu a hmanpui.

Chief Minister chuan mahni school zirlai naupang Board exama ti tha zual te chawimawina St Paul’s School thuneitute leh zirchhuak tawhte intelkhawm, Paulians’ Alumni Association tangdunin a a buatsaih thin chu midangte tan phurna a siam sak ngei a rin thu a sawi a. Kum tam tak kalta atanga zirlai tha tak tak alo chherchhuah tawhna te chu fakawm leh entawntlak a ni tiin, Chief Minister chuan St.Paul’s School chu tuna a dinhmunah duhtawk mai lova, Mizoram tana hmingthatna leh chawimawina sang dawng thei tura tan la thar zel turin a chah a. Chawimawina dawngtu zirlaite chu khawi hmunah pawh awm se, hna an thawhna reng rengah thawhrimna tluk hi a awmlo a ni tih hre reng a, insumna leh mahni inthununna ngaipawimawh reng turin a chah bawk a. Mizoram sorkarin zirlaite hnenah hna a pek sen vek dawn loh avangin kan state pawn leh ram pawn thlenga hna thawk theia inchher thiam turin a fuih bawk a ni.

Chief Minister hian he programme hi a ngaihpawimawh em avangin, a tel ngei ngeina tur, Raj Bhavana Information Commissioner thar lakluh inkhawm pawh a thulh phah a ni a ti a. Vawiin hi Rajiv Gandhi a thih champha, Anti Terrorism Day anih angin, a kaihhruaina hnuaiah Auditorium-a kalkhawm zawng zawngte nen, kan ramah muanna leh inlungrualna chawisan anih theih nan firfiaka chetna dona thutiam an sawiho bawk a ni.

Proficiency Awards hi Paulians’ Alumni Association, kum 2000 a din, a kum leh, kum 2001 atanga vawiin thlenga St. Pauls’ School thuneitute nena chawimawina hun hi la chhunzawm chhoh a ni a. Kumina Board Exam, HSLC a rank holder 12 leh HSSLC a rank holder 11 te hnenah certificate leh thilpek hi hlan an ni a.

Chief Minister leh a nupui Pi Lal Riliani ten an hlan a ni. Chief Minister hi Lt Col Z.S. Zuala, MLA in a tawiawm a ni.

Attachment

  • Loading attachment...