3348/2023-2024

Dated Aizawl, the 15th January, 2024: Vawiin khan Chief Minister Pu Lalduhoma chuan a office-ah Dr. Lalnuntluangi Hmar, Dean, College of Veterinary Science & Animal Husbandry, Central Agriculture University leh a thawhpuite a kawm a. An college Campus- a eitur thlai thianghlim leh thianghlim loh endikna, Pesticides Residue Anaysis Laboratory leina tur sum an dil chu RKVY atanga pek tura approve a nih tawh thu a hrilh.

NE India huama a hmasa ber tur nia an sawi he Laboratory hi Mizoram tan mai ni lo, hmarchhak state te tana tangkai tak tur a nih avangin sawrkarin a ngai pawimawh a ni, tiin Chief Minister hian Dean leh a thawhpuite hi a lo hrilh a. An fund dil chu RKVY atanga pek tura pawm (approve) fel tawh a ni, a ti. Mamawh dang an sawi, an hmunhma tihlen a tulna te, tuilak mumal leh hnianghnar zawk an mamawhna te pawh Chief Minister hian a theih anga a ngaihtuah tur thu a lo hrilh bawk a ni.

Chief Minister thar lawmpuina an hlan hnuah thusawiin Dr. Lalnuntluangi Hmar chuan, Pesticides Residue Analysis Laboratory hi kum hnih kal ta atanga an buaipui tan thu sawiin, mipuiten eitur, a bikin phai atanga lo lut chawhmeh te Tur leh chemical him lo dang an la pai leh pai loh endik theihna tur a nih avangin a tangkai hle dawn a, kan nghakhlel hle a ni. Laboratory building tur hi kan nei sa a, a enkawl thei mithiam pawh kan nei a, Laboratory Scientist post pawh a awm a ni. A khawl ber kan neih miau loh avangin a post hi kan hnawhkhat lo mai zawk a ni, tiin Laboratory nei tura pawimawh dangte an neih thu a sawi a. Khawl ber sawrkarin min ngaihtuahsak chuan tangkai takin kan hmang ang, a ti.

Selesih Vety College tia kan hriat lar College of Veterinary Science & Animal Husbandry, khi Central Agriculture University, Imphal hnuaia College pakhat a ni a. He University hnuaiah vek hian Horticulture College pawh Thenzawlah a awm a ni. Selesih Vety College ah hian Undergraduate (Bachelor) seat 85, Master Degree Course, department 16 leh doctorate zirna department, 10 a awm mek a. Bachelor bikah hian seat zaa sawmpanga, Post Graduate ah seat pakhat theuh leh Ph. D ah department pahnih te central in a hauhva, a bak zawng chu Mizoram atanga hnawhkhah a ni thin. Faculty zinga mi pakua te chu Mizo an ni. An zirlai batch hmasa ber hi 1997 khan West Bengal ah admit an ni a, 1998 ah Selesihah admission la zuiin, 1999 ah West Bengal a admission tite pawh lak chhoh vek an ni.