No.2664/2021-2022
Aizawl, the 21st October 2021 : Chief Minister Pu Zoramthanga chuan tukin zing khan 1st Bn. MAP Headquarters, Armed Veng-ah Hon’ble Chief Minister, DGP leh Police Officers ten Police Commemoration Day pualin hun hman a ni a. Mizoram Police, duty laia hmelma kut tuara thi tawhte hriatrengna “Martar Thlan” ah sunna leh zahna pangpar hlan a ni. Police Commemoration Day hi India ram pumah leh Mizoram District Headquarters leh Battalion Headquarters-ah te vawiin hian hman a ni.

Chief Minister ho a Police Commemoration Day puala hun hmanah hian DGP Pu S.B.K. Singh chuan kumina India ram hmun hrang hranga Police, ni 1.9.2020 atanga ni 31.8.2021 chhunga duty laia nunna chan state tin in a neih zat a chhiar chhuak a. A vaiin mi 377 an ni a, kumin chhung hian Mizoram Police zingah duty laia hmelma kuta thi an awm lo a. Duty laia COVID-19 avanga thi mi 6 awmin, chung mite hming chu chhiar chhuah tel a ni.

October ni 21, 1959 khan India ram chhhunga awm Aksai Chin pela ralthuam famkim nena rawn lut ru China sipai rualte chuan mahni ram venghim tura hnathawk (duty) mek India Police-te chu Hot Springs (Ladakh)-ah an lambun a. Police huaisen tak tak sawm (10) lai maiin nunna hlu tak an chan phah a ni. He ni hi Police, ram tana nun pete hriatrengna “Commemoration Day” atan India Sorkar chuan puangin ram pum puiah kum tin hman an ni ta a. Hemi ni zing dar 8-ah hian India ram State Capital-ah leh District Headquarters-ah te Commemoration Day Parade neih thin a ni a, India ram puma Police duty laia thite hming chhiar chhuakin anmahni hriatrengna leh sunna urhsun taka hman thin a ni a.

Tukin khan ram puma Police Commemoration Day hmanna pui ber chu National Police Memorial, Chanakyapuri, New Delhi-ah Union Home Minister hovin hman a ni.