1570/2025-2026

Aizawl the 24th September 2025: Vawiin khan Chief Minister Pu Lalduhoma chuan CM Conference Hall-ah Mizoram State Project Monitoring Committee Annual Report 2024-25 a tlangzarh a. Project Monitoring Committee te hnathawh tawh chin chu a tha tawk hle a ni, a ti.

Chief Minister chuan, Project Monitoring Committee hi Mizoram mipui aiawh zo tak ni tura din a ni a, member tam tak nei vek Pawl hrang hrang hruaituten thukhat vuaa kan rama hmasawnna hnathawh in endikho hrim hrim pawh hi a ropui a ni. Rawtna tha tak tak in rawn neih tawhte rinchhanin kal dan tha zawk kan kalpui bawk a. A tangkai em em a ni. Annual Report hmasaber in han zo va, tun atang chuan kan sorkar hnua kan hmalakna lam te in en tan thei tawh dawn a. A tir atanga in vilpui hnate chu a tha tawh hle turah kan ngai, a ti a.

Kan ram tan hna tha in thawk mek a, in thawh tawh chinte pawh a tha tawk hle. Tumah hlau suh u. Ruling mi leh sa nih chhuang an lo awm a nih pawhin hlau suh u, in lamah kan tang zel ang, tiin an hmalak zelna turah huai taka kal turin a chah a ni.

Er. Lalthanzuala Ralte, Member Secretary chuan Annual Report chungchang a sawifiah a. An project endikte chu Work Profile format siama Planning Department atanga an lak khawm an ni a. Heng project an lak khawm atang hian mipui nek na leh bihchian ngai zual nia an hriatte zirchiangin a hmunah kal chilhin an hnathawh dan te, hnathawh tawh chin te, hna that leh that loh te hmanraw hman chungchang te, expenditure chungchang te leh harsatna an tawhte an en a. Repott fel tak ziah zel a ni a. Tin, a hmuna hna en hma leh en zawh hnuah project neitu (Nodal deptt) te, Executing Agency te leh Contractor te nen Pre & Post Visit Discussion an nei zel thin.

Kum 2024_ 2025 sawrkar kum chhungin Mizoram State chhunga project sawmli pasarih (47) an tlawh zinga sawmli pahnih (42) te chungchang he Annual Report-ah hian dah a ni a. Project kal lai mek ni tawh lo, hman tangkai lohva dah tawl tak, uiawm tak tak Mizoram Polytechnic buildings district panga (5) Champhai, Kolasib, Mamit, Lawngtlai leh Siaha a mite tlawh telin, an dinhmun theuh te he report ah hian dah tel a ni. Education Sector-ah hian a thupui ah “Zoram Rohlu - Eklavya Model Residential School” tih hmangin Central sikul Mizoram, Ministry of Tribal Affairs MoTA) in an rawn dah chungchang bengvarthlak tak, a chhiartute ngaihtuahna kaihruai thei tur zeh tel a ni bawk.

Annual Report bua lang Project an endikte dinhmun chu hetiang hi a ni:

1. Social Sector-ah project pariat,
2. Education Sector-ah project sawm,
3. Health Sector-ah project pariat,
4. Communication (Road & Bridges) ah project pasarih,
5. Veterinary Sector-ah project pakhat,
6. Fisheries an project pakhat,
7. Sports ah project panga,
8. Public Health-ah project pakhat leh
9. Agriculture Sector-ah project pakhat an ni.