Chief Minister Pu Lal Thanhawla chuan vawiin khan Mualpui, Aizawla Rajiv Gandhi Stadium tur sak hna kal mek chu a hmunah kalin a enfiah.

Chief Minister hian Stadium hi chik taka fang kualin, a sak hna enkawltu Mizoram PWD Engineerte chuan chipchiar takin hnathawh chi hrang hrangte chu an hrilhfiah a. Chief Minister chuan Stadium tur chu a tha thawkhat hle a ni a ti. Tuna sum ruahmanna awmsa hian Stadium puitlinga a peih theih hrih dawn loh avangin, anih tur anga tih puitlin anih theih nan tul leh mamawh ang te chu ngaihtuah chhoh zel a ni ang tiin, sak puitlin ngei a tum thu a sawi a ni.

Rajiv Gandhi Stadium sak mek hi, tarlan tawh thin angin Stadium puitling ni thei tur hian sum Rs. 150 Crore mamawh a ni dawn a. Phase I Project atana Rs.25 Crore 12th Finance Commission atang hmuh chu hman zawh tawh a ni a. Hemi baka State Plan Fund Plan atanga Rs. 10 Crore pek belh pawh 90% hman zawh tawh a ni bawk. North East Games Mizoramin a thlen dawn avangin, tuna synthetic track hna thawh mek hi a hun aia hma a lo thawh lawk anih thu Engineerte hian an sawi bawk a ni.

Chief Minister hi Pu H.Liansailova, Finance Minister in a tawiawm a. An haw leh lamah Pitarte Tlanga Indoor Stadium sak hna kal mek pawh an tlawh nghal a ni.