Mizoram State Commission for Women leh National Commission for Women, New Delhi tangkawpin, vawiina Aijal Club-a seminar on ‘Rape and Human Trafficking’ a buatsaih chu Chief Minister Pu Lal Thanhawla’n a hawng.

Chief Minister chuan Mizoram State leh National Commission for Women in hetiang seminar a buatsaih hi kan boruak tawn chhoh mek nen a inhmeh hle a ni, a ti a. Hmanni maia New Delhi-ah medical zirlai hmeichhia, bus tlan laiah pawngsual rawna, rawng taka thah anih khan ram mipuite rilru leh ngaihtuahna a kaiharh hle a.Hmeichhiate chunga hleilenna leh pawngsual tam tak thlengah hian kan hriat lem loh, abikin thingtlang lamah sawichhuah loh tam tak a awm thin ngei a ni, a ti a. Amaherawhchu report thehluhte pawh bawhzui that tawk a ni lo thin hi a vanduaithlak hle a ni, a ti a. Pawngsualtu hremna dan ennawn tura tih, Justice Verma Commission pawhin report a thehlut tawh a ni, a ti a. Chief Minister chuan dan in a khap, thil siamna hmuna naupang leh hmeichhiate chhawrluihte, sumdawnna a hmanga hmeichhiate nawhchizawrh luih tirte leh mahni zahawmna leh hmingthatna humhim duh vanga nunna lak (honour killing) te pawh duh anga kenkawh a nilo thin chu a pawi hle a ni, a ti.

Mizoramah kum 2009 - 2011 chhunga pawngsual case chungchang a sawilan ah Chief Minister chuan kum 2009-ah trial 152-ah chinfel 52, pending 90, kum 2010-ah trial 184 ah chinfel 87, pending 97 , kum 2011-ah trial 165-ah chinfel 57, pending 108 anih thu a tarlang a. Chief Minister chuan mihring zahawmna tichhetu ber chu pawngsual a ni tiin, kan ramah kumtlinglo thlenga pawngsual hi a pung chak hle a a hriat thu a sawi a.Heng pawngsual tawkte hi endawng lova tanpui dan ngaihtuah zawk hi kan tih tur a ni a ti a.Pawngsual case ngaituah chhung rei lutuk thin hian a case alak nep tir thei a, pawngsual a tipunlun phah thei bawk a ni a ti a. Chuvangin fast tract court te hi din ve a tha mai lawm ni tia a ngaihtuah thin thu sawiin, Justice Verma Commission report pawh hman ve ni se a that a rin thu a sawi bawk a ni.

Chief Minister chuan hman zan lawka Bethlehem venga in leh motor leh bike hal chungchangah sorkar leh police mawh a ni meuh mai a tiin, kan zavaia kan tan tlan a ngai a ni, a ti.

Seminar hawnna inkhawmah hian Pi Wansuk Syiem, Member, National Commission for Women, New Delhi (in charge of North East) chu khualzahawm a ni a. Amah hi Pu Anil Pradhan, Member, Expert Committee (NCW), Pu J.K.Unyial, Pay & Accounts Officer (NCW) leh Pi Sarla Arya, PS ten an rawn tawiawm a ni.

Seminar-ah hian resource person Pu C.Zorammuana,DIG (Northern Range) in ‘An Overview of Rape Cases in Mizoram since 2011’ tih leh Pu Joseph Lalchhuana, SP, CID (Crime) in “Concepts, Trends and Status of Human Trafficking’ tih thupui hmanga paper an present te chu sawiho a ni.

Seminar hi Pi Lalnipuii, Chairperson, Mizoram State Commission for Women in kaihruai a ni.