4272/2025-2026

Aizawl the 3rd February 2026: Vawiin khan Chief Minister Pu Lalduhoma chuan a office-ah Registrar of Cooperative Societies Computerisation a hawng.

Thusawiin Chief Minister chuan, mipuite tana sorkar dawr dan awlsam leh rang hi kan ngaihlu a, kum hnih chhung lekin chutiang hmalakna chu kan nei nual tawh a. Hmalakna pawh a awm chho zel a. Digital service lama India rama hmahruaitu nih hi kan duh a ni. Kan state a zim a, mipui kan tlem a, ziak leh chhiar thiam vekna state kan ni a, sap tawng hria kan tam a, digital service lama a tha ber nih theihna remchang kan neiah kan ngai a ni. Hma pawh kan la nasa a, kum hnih chhung hian Online Service portal hi 20 aia tam kan siam tawhin a rinawm.

Hman ni lawkah khan Mizoram CSR Connect portal kan hawng a, vawiinah Cooperation Department Computerisation kan han hawng leh ta a. Khaw hrang hranga kan society-te tan awlsamna tam tak a thlen dawn a, a thawktute tan pawh awlsamna a pe dawn che u a ni, a ti a. Hun reilote chhunga hawn theiha an peih avangin Minister leh Department-a thawktute chungah lawmthu a sawi.

Cooperation Minister Pu PC Vanlalruata pawhin thusawiin, he hmalaknaah hian India rama a thawk zo hmasa ber dawttu kan ni a, Mizorama a puma office computerise hmasa ber kan nih kan inring bawk a, kan chhuang hle a. Chief Minister ngeiin min hawnsak se kan duh a, kan beisei ang taka vawiina min hawnsak hi kan lawm hle a ni, a ti.

Pu Udit Prakash Rai, IAS, Commissioner & Secretary, Cooperation Department chuan RCS Computerisation chungchang sawifiahna a nei a. He project hi Mizoramah 29th March 2025 khan kalpui tan a ni a. RCS Office, Aizawl chauh ni lovin district hrang hranga cooperative office-te a huam vek a. Cloud Infrastructure atan hian INEXT Systems Private Limited, Zarkawt, Aizawl chu thlan an ni a, Software development hi National Informatics Centre Services Incorporated (NICSI) kaltlangin an empanelled firm Velocis Systems Pvt Ltd (CMMI Dev 2.0 Maturity Level 5), Noida, Uttar Pradesh, chuan software hi an siam a ni.

“RCS, Mizoram Office Application/portal” cooperation.mizoram.gov.in hi Computerization of RCS Offices of States/UTs project hnuaia thawh a ni a. Computerization of RCS Offices of States/UTs hi Ministry of Cooperation centrally sponsored project “Strengthening Cooperatives Through IT Interventions” hnuaia mi a ni.

He project-in a tum ber chu cooperative society-te tana an hna thawhna kawnga samkhaina (ease of doing business) siamsak leh cooperative society-ten a hmuna office dawr kher ngai lova digital-a RCS office leh district hrang hranga cooperative office-te nena an indawr tawn theihna tur a ni.

A hawnna hunah hian Pu Udit Rai Prakash IAS, Commissioner & Secretary, Cooperation Department, Pu John LT Sanga, Registrar Cooperation leh Officials- te bakah Cooperative Societies hruaitute an tel a ni.