No.6426/2020-2021

Vawiin chawhnu-a SAD Conference Hall, MINECO-ah Health Minister Dr. R. Lalthangliana hova sawrkar hotu pawimawhte thukhawm chuan Aizawl Municipal Corporation Area a inkharkhip kalpui mek chu an thlirho a, kan dinhmun uluk taka thlirin AMC area inkharkhip chu mipuite himna atan pawhsei tha an ti a. Chief Minister Pu Zoramthanga hnenah rawtna thlen a ni ang a, a remtih dan ang zawmin Chairman, State Executive Committe, State Disaster Management Authority-in thupek a chhuah ang. Meeting-ah hian Home Minister Pu Lalchamliana, Medical Operational Team on COVID-19 Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah sawrkar hotu pawimawh dangte an tel a, Mizoram Kohhran Hruaitu Committe (MKHC), Jt. NGO Coordination Committee leh Indian Medical Association aiawhte an tel a ni.

Integrated Disease Surveillance Programme (IDSP), H&FW department report danin October kar hnuhnung ber (October 25 - 31) inkar khan Mizoramah sample 9781 test a ni a. COVID-19 positive 309 hmuhchhuah niin an zinga 121 (39.15%) hi natna langchhuak (symptomatic) an ni a, 188 (60.84%) hi natna langchhuak lo an ni. Hemi hun chhung hian AMC area a local council 83 awm zinga 54 ah positive thar hmuhchhuah an ni a. Positive hmuh chhuah tawh zawng zawng zinga 2128 (77.20%) hi mipa an ni a, 629 (22.81 %) hi hmeichhia an ni. COVID-19 positive hmuhchhuah tawh zawng zawng zinga 1654 hi Travel history nei, State pawn atanga lo lut an ni a, 1103 hi Mizoram chhunga hri kai an ni. Positive hmuhchhuah tawh zawng zawng zinga 94.45 % hi civil mi an ni a, Para-Military Forces leh Army hi 3 % niin, Frontline workers positive hi 2.54% an ni.

Contact tracing team report danin vawiin November ni 2, 2020 zingkar thleng khan Mizoram pumah COVID-19 positive 2757 hmuhchhuah an ni a. Aizawl district ah 1883, Lunglei district ah 282, Siaha district ah 32, Champhai district ah 26, Kolasib district ah 253, Serchhip district ah 87, Lawngtlai district ah 100, Mamit district ah 59, Saitual district ah 15, Khawzawl district ah 7 leh Hnahthial district ah 13 an ni. Zaipawl hla zirna hmun pahnih a in kaichhawng mi 18 an awm a, Office kaihhnawih a hri kai 45 awmin, Zirna in hrang hrang kaihhnawih a positive 119 an awm bawk. Damdawi in leh a chhehvela positive hmuhchhuah 48 an awm a, tun thlenga contact tracing team in hnu an chhuina a an contact tawh zawng zawng zat hi 25,596 a ni a. Contact tracing tih ngai a pun zel avangin hri kaina hriat harsa zualte umzui tur team thar din tum a ni bawk.

Meeting ah hian COVID-19 hri kai ni lo, natna dang nei non-COVID patient te ngaih pawimawh a tul thu sawi a ni a, non-COVID patient te tan emergency thila biak tur helpline siam a tul thu tarlan niin, Sawrkar laipui thupek angin Health sub-centre leh Upper PHC te pawh hawn chhunzawm a tul dawn thu tarlan a ni.

COVID-19 positive zinga naupangte awmna tur bik Child-friendly COVID Care Centre atan Bal bhavan, ITI chu buatsaih mek a nih thu leh reilote ah naupangte awmna tura peihfel a nih tur thu tarlan a ni a. Mizoram Kohhran Hruaitu Committee kaihhruaina in Television kaltlangin programme siam a that thu sawi a ni a, he hunah hian Zoram mipui zawng zawng a ruala tawngtai nise, COVID-19 laka kan him theih nan leh ramri buai chungchang tha taka chinfel a nih theihnan tawngtai rualna hi neih nise tih a ni.