2556/2024-2025

Dated Aizawl, the 16th October, 2024: Vawiin khan Regional Institute of Paramedical & Nursing Sciences (RIPANS) chuan Baptist Centre, Falkland ah 24th Graduation & Lamp Light Ceremony an buatsaih a. Chief Minister Pu Lalduhoma chu khuallian a ni.

Thusawiin Chief Minister chuan, Mizoram mai ni lo, India ram huap pawha Paramedical Science zirna changtlung leh tha RIPANS kan nei hi kan vannei hle a, Mizo thalai tam takten he hmunah hian zirna tha tak tak an lo dawng tawh a, an dawng mek zel bawk a. Vawiinah pawh thalai engemawzat an pass chhuak a, zir thar tur tam tak an lut bawk.

Graduate thar te ka lawmpui a, hah tak leh rim taka in lo zir te kha vawiinah chuan ram leh mipuite rawngbawl nan in hmang thei ta. Chutiang bawkin zirlai lut tharte pawhin in dam chhunga in thawh tur hna atana inbuatsaihna in tan dawn a, in vannei a ni. Mipuiten nangni ang thiamna nei kan mamawhna hi a sang tial tial a ni. In pawimawhzia hi hman ni lawka khawvelin hripui a tawrh lai khan fiah takin a lo lang a, khawvel mupuite hian kan health professionals te lakah lawmthu sawi mawlh mawlh tur kan ni. Hna tangkai, rawngbawlna pawimawh thawktu in nih hrerengin, mite tidamtu, mite thlamuantu in ni zel dawn nia. Inhlawhna emaw in tih chuan in hmaah hun harsa tak tak a lo chhuak ang a, in beidawngin in inchhir thei hial ang. Nimahsela, in hna thawh tur hi inhlawhna ni lovin rawngbawlna leh kohna ropui tak chhanna a ni. Lamp Lighting ceremony hi chu chuan min hriatpui. Mahni inphata midang tana inpeknain kaihhruai tlat che u se la, in awmna apiangah malsawmna ni zel ang che u, a ti a. RIPANS in harsatna a tawh mek, a bik takin Faculty lama an indaih lohna te chu theih tawp chhuahin a ngaihtuahpui dawn tih a hrilh a ni.

Zirna in tha leh changtlung tak an kalpui avangin RIPANS thawktute zawng zawng chungah lawmthu a sawi a. Mizoram mai ni lovin India hmarchhak state ten kan tangkaipui em em a. In hnathawh hi a ropui a ni, a ti.

Class tina top 3 te hnenah Chief Minister hian Proficiency Award a hlan bawk.

Prof. Sanjay D. Sawant, Director, RIPANS pawhin thusawiin, an college dinhmun tlangpui leh hmalak dan a tarlang a. Chief Minister -in an hun buatsaih a telpui avangin lawmthu a sawi. Prof. Lalfamkimi, Principal, College of Nursing, RIPANS chuan Nursing Coyrse an kalpui dan tlangpui a sawi a. B. Sc nursing hi kum li chhung zir, 8th Semester course a then a ni a, tunah hian B.Sc zilai mi 196 an awm mek. M.Sc Nursing zirna hi nikum 2023 atang khan kalpui tan a ni bawk a, zirlai 25 ten an zir mek a ni.

24th Graduation & Lamp Lighting Ceremony ah hian B.Sc Nursing degree hi mi 39 ten an graduate-a, 1st Semester zirlai thar tur mi 53, India hmarchhak state pariat leh Jammu & Kasmis atanga kal khawm te lakluh an ni bawk. RIPANS atang hian batch hmasa ber; kum 1996 atanga vawiin thlengin mi 788 te an graduate tawh a. Graduate tawh zawng zawng te hian thawhna tur hmun (placement) an hmu vek a ni.