No.1234/2020-2020

Aizawl the 20th May, 2020: Chief Minister Pu Zoramthanga chuan a department chan Horticulture Department hnuaia Sairanga Cold Chain Development hmalakna chu a hmunah a enfiah.

Cheng nuai 250 seng a Cold Chain building - Integrated Pack House hi 3,950 sq.ft. a zau niin, a chhungah hian thlai dah vawhna chamber pali a awm a. He project hi a vai chuan zawh fel a la ni lo deuh a. Chief Minister ho hian hmabak la awm te leh he hmun hi a tangkai thei ang bera chhawr zui zel dan turte sawi hovin Horticulture Department hotute nen a hmunah an enho a ni.

Cold storage hi en chhinna (trial) neih tawh niin a tha in a hman tlak dawn hle tih finfiah a ni a. Thei leh thlai tawih awlsam tak tak te hun rei tak chhung vawn that nan a tangkai dawn mai bakah sawngbawlna tur hmanrua hrang hrang a awm bawk a. Thei leh thlai thartu ten a vanglai (peak season) a hralh bang dah that a, a van hun (off-season) laiin man man zawka an hralh theihna tura ruahman a ni.

Integrated Pack House chhungah hian thei leh thlai dah vawhna tur room/chamber pali awmin a vaiin quintal 800 a len bakah grading tihna hmunah quintal 200 a leng bawk a. A building pumpui hi duansa rem khawm (pre-fabricated) niin foundation tha taka siam chungah rem khawm a ni a. A bang hi PUF (Polyurethane Foam) inthuah (sandwich panel) a siam a ni a, a chhung hi power supply tello pawhin pawn boruak aiin a dai zawk a ni.

Chief Minister hi  MLA Pu F.Lalnunmawia, MLA Pu Zothantluanga, Addl Chief Secretary Pu J.C Ramthanga, Horticulture Director Dr. Elizabeth Saipari leh thawktu dangten an tawiawm a ni.