Salvation Army India Eastern Territory Motherless Babies’ Home, Aizawl in kum 60 a tlin, Diamond Jubilee lawmna Aizawl Temple Corps Booth Mansion Halla vawiina neihah, Chief Minister Pu Lal Thanhawla chuan a hmanpui.

Chief Minister chuan Salvation Army in kum 60 chhung zet Pathian chaknaa innghata nau hnuchham enkawlna In an kalpui chu a lawmawmin a ropui hle a, Pathian hnathawh ropui tak a ni a ti a. Salvation Army hian vantlang tan hna ropui tak tak thawkin, hetiang social service a an inpekna hi an entawntlak hle a ni a ti.

Chief Minister chuan Salvation Army ah a hman changa a inkhawm ve thin thu sawiin, kohhran hrang hrangte inpawh zawk nan leh inzawmkhawmna a thlen theih nan, kohhran tinte hian kohhran dang memberte chu an memberah min neih a, keini pawh an member anga kan awm bawk hi kan tih tur tul hmasa a ni a ti a. Kan awmna theuh hi Pathianin a rawngbawl tura min dahna a ni a, kan hnathawhna hmun theuhah kristian dik tak kan ni tih kan tilang thei a ni tiin, kohhran mi kan nih ang theuhin kan hnathawhna theuhah tui taka thawh hi kan tih tur a ni a ti.

He diamond jubilee lawmna hriatrengna souvenir, ‘Enchimloh’ tih Lt Col Lalramhluna buatsaih chu Chief Minister chuan a tlangzarh bawk a ni.

Motherless Babies’ Home hi enkawltu bik Board Member 8 awmna hnuaiah kalpui a ni a. Tunah hian naupang te te 37 leh nausen an awm mek a ni.