2715/2024-2025

Dated Aizawl, the 28th October, 2024: Vawiin khan Planning & Programme Implementation Department Conference Hall -ah Chief Minister Pu Lalduhoma chuan Sustainable Development Goals Dashboard thar leh Project Monitoring Committee Dashboard thar (MPLAN) a hawng. Data lakkhawm hna kalpui zui nghal a ni dawn a. Chief Minister hian department te chu data dik tak zel thun tum turin a chah.

Thu a sawinaah Chief Minister chuan, hun reilote chhunga dashboard pahnih peih a ni hi a lawmawm a, a thawktute chungah lawmthu ka sawi a ni. Heng kan dashboard pahnih te hi data dik tak thunluh hmanga kalpui tur a ni a. Data dik lo kan thun chuan kan dinhmun dik tawk lo min pho chhuahtir dawn a. Chuvangin Department tinten an data te chu dik tak chauh rawn thun turin ka chah a ni. Data dik a nih phawt chuan tlakhniam deuh pawh i hreh lo ang u. Kan dinhmun dik tak kan hriat kha a pawimawh hmasa a ni, a ti.

Project te hi khuarei daih (sustainable) hmasawnna min thlentu an nih a ngai a. Project thenkhat hi tha tak angin lang mahse kawng danga min tichhetu a lo ni ve reng thei. Chuvang chuan project khuarei daih leh tha zel kha kan thlan thiam a ngai. Tin, project kal fuh tawk lo, han hlamzuih te, a huna zo thei lo te a awm loh nana vil rengtu tur project monitoring committee kan nei tawh a, member pawh mipui huapzo tak a ni. Kan project te hi kal tluang se, a hun takah zo thei ila, kan ram hian chak takin hmasawnna hmu se kan duh a ni. Chumi kawnga nasa taka min puitu tur chu vawiina kan hawn MPLAN dashboard hi a ni. Role Base Access Control nei a nih angin ka office room atangin engkim ka lo hmu ve thei tawh dawn a. Ka nghakhlel hle a ni, a ti.

SDGs dashboard hi Ministry of Personnel Public Grievances and Pension leh Planning and Programme Implementation Department, Government of Mizoram te sum thawn dun hmanga siam a ni a. A siam turin UNDP te chu thawhpui an ni. Sustainable development goals lama state level atanga village level thleng vilna tur a ni. Mizorama khua zawng zawngte SDGs dinhmun a en theih ang a, Block level dinhmun te, district level dinhmun chenin a en theih ang. SDGs Local Indicator Frameworks hi state sawrkarin a duh dan anga a duan tur a ni.

MPLAN Dashboard hi Integrity Tech Solutions Private Limited te nena siam a ni thung a. A siamna tur sum hi NITI Aaayog State Support Missions atanga hmuh Rs. 69.99 lakh a ni. He dashboard hi project proposal te, DPR te thehluhna tur a nih bakah cost benefit analysis te, project feasibility te lo zirchian (analysis) thlengin a thawk thei a. Project ziaktute tan state level data pawimawh hriatna a pui thei bawk ang a, project monitor lamah a tangkai hle ang. Project details te, project management te, scheme surveillance te, project evaluation te, project resemblance matrix te leh best practices thlengin a lang vek dawn a ni. Mizorama kalpui Central Sponsors Scheme (CSS), Central Sector Schemes leh State Projects zawng zawngte dinhmun leh hmasawn dan chipchiar taka dah luh vek tur a ni a. Role Base Access Control neia duan niin heng projects zawng zawngte kalpui dan hi Chief Minister chuan a office atangin engtiklai pawhin a lo hmu ve nghal zel thei dawn a ni.

Dr. Renu Sharma, Chief Secretary pawhin thusawiin, hmasawnna chhinchhiahtlak vawiinah Mizoramin kan hmu a. Heng dashboard-te a hlawhtlin theih nana thawktute zawng zawng chungah lawmthu ka sawi a ni. Schemes kan thawk a, a thar a lo chhuak ve zel bawk a. Heng kan scheme thawhte hi mumal lehzuala kalpui a nih dawn bakah tha zawkin monitoring kan ti thei dawn a, hnathawh chak zawk leh hlawk lehzual a hring chhuak ang. Project thawktute leh sawrkar lam atanga viltute tan awlsamna min pe ve ve dawn bakah langtlang lehzualin Mizoram hmasawnna hnathawh hi a kaltir dawn a ni, a ti.

A hawnna inkhawm hi Pu Vanlaldina Fanai, Commissioner, Planning chuan kaihruaiin sawi hawnna a nei a. Pu Lalmalsawma Pachuau, Secretary, Planning chuan heng dashboard pahnih te an duan chhoh dan tlangpui a sawi bawk. Heng dashboard pahnih te hi data thun hna thawh leh phawt tur niin nakkum January thlaah chuan kalpui hman tum a ni.

A hawnna inkhawmah hian Minister Pu F. Rodingliana, Prof. Lalnilawma, Pu Lalnghinglova Hmar, Pu TBC Lalvenchhunga, Adviser to CM, Dr. KC Lalmalsawmzauva, Adviser to CM (Hand Holding), Pu Kenneth Chawngliana, Vice Chairman, Mizoram State Planning Board, leh official pawimawh thahnem tak an tel a ni.