2412/2024-2025

Dated Serchhip, the 7th October, 2024: Vawiin khan MJA General Headquarters buatsaihin Serchhip Press Club-ah Seminar on Cyber Crime buatsaih a ni a. Bialtu MLA Pu Lalduhoma, Chief Minister ni bawk chuan a telpui. MJA hian Seminar on Cyber Crime hi district tina kalpui an tum a, an nghahna hmun bialtu MLA apiangte chu telpui turin an sawm a ni.

Pu Lalduhoma chuan, IT lamah hma kan sawna kan tangkaipui em em laiin he hmasawnna hi misualte pawhin an lo hmang tangkai ve zel a. Internet kaltlanga inbumna a tam em em a, a pung zel emaw tih mai turin a awm. Heng sualna laka kan him theih nan mipuiten a chin kan hriat a ngai a, vawiinah Journalists ten a zirhona in han buatsaih hi lawmawm ka ti a. In zarah mipuite pawhin zau taka an lo hriat kan beisei dawn a ni, a ti. Cyber Crime bik buaipuitu tur bik Cyber Crime Police Station hi May ni 20, 2022 khan Mizoram sawrkarin a din a, din a nih kum hian case 158 ziahluh nghal a ni. Nikum 2023 khan case 72 leh kumin kum kal mekah case 33 ziahluh tawh a ni, a ti. Fimkhur tura mipuite zirtir uar a pawimawh ang bawkin misualte dap chhuah leh hrem kawnga thawktu - dan kengkawhtute pawh kan inbuatsaih sauh sauh a ngai a. Technology danglam chho zelah misualte hi a theih chin chinah kan fin khalh tur a ni.

Hnam dangten ram hla atanga min rawn bum an tum hi chu engemaw chenah a hriatthiam theih viau a. Mahni hnampui leh thenawmte bum tuma lo buai ve ngar ngar kan awm a nih chuan; i sim ang u, tiin mipuite a sawm a ni.

Seminar hi Pu C. Lalrambuatsaiha, President, MJA, HQTRs chuan a kaihruai a.  Pu. C. Lalhminghlua President, Serchhip chuan inlawmna thu sawiin Pu K. Zothanpara, General Secy, MJA  Qtrs leh Pu T. Biakchamliana, Secrtary, MJA Serchhip ten report an pe a, Pu Zonunsanga, Addl. SP, CID Crime chuan zirtirna a pe a ni.

MJA General Headquaters hian district tinah hetiang Seminar hi kalpui an tum a. Vawiinah hian bul tanin naktukah Lawngtlaiah an buatsaih leh ang.