Mizo Zirlai Pawl(MZP), Gen Hqrs, Aizawl buatsaih, Seminar on ‘Separate Time Zone for North East’ chu vawiin khan Vanapa Hall-ah hman a ni a, Chief Minister Pu Lal Thanhawla chu khuallian a ni.

 

 

Chief Minister chuan hetiang thil tul tak leh tuah tawh tak sawiho tura seminar, MZP ten an buatsaih chu lawmawm a tih thu a sawi a. India ram zau tak hian darkar hunbi, time zone pakhat, Indian Standard Time(IST) kan hmang hi tidanglama, time zone hrang pakhat aia tam hman duhna vawi tam tak, kum 1980 ah te, 2001 ah leh 2004 ah te sawilan a nih tawh thin thu tarlangin, India sorkar chuan ala remti lo a ni a ti a.Tunah hian Science & Technology Department hnuaiah a awm thu a sawi a. Pu Hawla chuan ram changkang tam takah time zone 5 neite pawh an awm thu sawilangin, IST chauh kan hman hian India Hmarchhak mite hian kan tuar em tihte kan ngaihtuah a tul a ni a ti a. Tuna UPA sorkar bengah ngei pawh a luh tawh thu sawiin, India Hmarchhak tan time zone hran hman duhna hi inlakhranna duh vang nilovin W.Bengal pawh tel ve na ‘Eastern Time’ ti tea alo sawi tawh thin thu a sawi a. North East mite hi India mi dik taka min pawm anih chuan eatern time tih pawh hi min pawm sak ve mai turah angaih thu a sawi bawk.

Khualzahawm Pu Benjamina, Registrar, MZU chuan University kaihhnawih nilo, function danga a tel ve ngai loh thu sawiin, India Hmarchhak tana time zone hran hman hi a thinlunga a khah liam avanga he seminar a rawn tel anih thu a sawi bawk.

Seminar hun hmasa hi MZP Vice President S.Lalrinawma’n a kaihruai a. Seminar a resource person chu Jahnu Barua, Padma Shree dawngtu, Guwahati ami a ni a. Chawhnu huna sawihonaah Prof.Lianzela, Department of Economics leh Prof.P.Rinawma, Department of Geography, MZU ten thusawina hun an neihpui bawk a ni.

Mizoram pawnlam atangin zirlai hruaitu, Arunachal Pradesh, Tripura leh Manipur atangte in an lokal a, NESO hruaitu te an tel bawk a ni.