Chief Minister Pu Lal Thanhawla chuan vawiin khan Serchhip a Jawaharlal Nehru (JN) Hospital kum 50 tlin lawmna, Golden Jubilee Celebration ( 13th May 1961 - 13th May 2011) a hmanpui a, Hospital Tarpi Tlanga sak tur lungphum a phum nghal bawk a ni. Tarpi Tlang veka Nursing School din tur lungphum pawh Health Minister Pu Lalrinliana Sailo chuan a phum bawk.

JN Hospital Golden Jubilee lawmna ah thusawiin Chief Minister chuan Serchhip district a hmasawnna hrang hrang lokal chho mek hi Pathianin sorkar hmanga malsawmna a pek a ni a ti a, Serchhip district mipuite chu lawm nachang hre turin a chah a. Pu Hawla chuan lawmthu sawi ka ba kan tih thin hian lawmthu sawi hi bat a ngai lova, sawi nghal mai tur a ni a ti. Hospital hi Serchhip khaw laili taka awm anih avanga 'bawlhhlawh lianpui' ang alo tih thin, a tira dahna hmun tura ruahman, hla an tih si, Tarpi Tlanga a thar sak tura tih a ni chu lawmawm a tih thu a sawi a.Mizote hi ringtu kan nih angin hrisel ber awm tak kan ni tiin, faina leh thianghlimna kawngah zir tur kan la ngah hle a ni a ti a.Sim tur kan nei anih chuan kan sim mai tur a ni a ti a, ringtu kan nihna hi kan thil tih theuhah rim taka kan hman angai a ni a ti.Hmasawn tur kan nih chuan ngaituah tur tam tak a awm anga, sim tur tam tak a awm bawk ang a ti.

Pu Hawla chuan Mizoten kan mamawh ber chu rilru leh thinlung siam that, moral reformation a ni a ti a. Chuvangin a chhelai siam thatu ni tura koh vek kan ni a ni a ti. Health Care Scheme hmang thei tura bithliah ten an hman theih nan in regiter a tul hmasak thu sawiin, BPL card neite chuan a hminga pawisa tlemte chawia in register-in natna khirh tak tak a thlawnin sorkarin a enkawl theih thu a sawi a. Chuvangin in register hmasak ngaipawimawh turin mipuite chu a chah a ni.

JN Hospital thar  khum 100 awmna sakna tur atan hian cheng nuai 103 sanction tawh a ni a. Nursing School hi Serchhip district bakah Champhai, Lawngtlai, Kolasib, leh Saiha ah te  din a ni dawn a, hemi atana 1st installment cheng vaibelchhe 42 sanction tawhah cheng vaibelchhe 19.125 release tawh a ni. JN Hospital hi a tirah chuan 20 Bedded Hospital Serchhip, Aijal - Lunglei Road tih a ni a, chumi hnuah JN Hospital tia hming thlak a ni.Hospital hi a tirah chuan Dispensary anga thawk tanin Dr.Saichhunga (L) chu doctor hmasa ber a ni. Tunah hian doctor 11 leh nurse 21 an awm a, Serchhip district Chief Medical Superintendent hnuaia awm a ni.

Lawmna inkhawmah hian he hospital din tirh atanga thawk la dam awm R.Siapithanga leh Roliani te chawimawina  thilpek hlan an ni a. Inkhawm hi Serchhip District Bawrhsap Pu H.Darzika'n a kaihruai a ni.Health Minister Pu Lalrinliana Sailo leh Parliamentary Secretary Pu S.Laldingliana ten thusawina an nei bawk. Health Minister hian he hospital bula AYUSH Hospital thar sak zawh tawh chu a hawng bawk a ni.

Attachment

  • Loading attachment...