4896/2024-2025

Aizawl, the 29th March 2025: Vawiin khan Serchhip DC Conference Hall-ah Serchhip District in UD & PA department buatsaih District Beautification Competition-a lawmman pathumna an lak a taka kalpui tanna 'Launching of Serchhip District Beautification Project' neih a ni a. Bialtu MLA Pu Lalduhoma, Chief Minister chuan a telpui.

Chief Minister chuan, Serchhip DC leh a thawhpuite thawhrim rah, cheng nuaih sawmnga zet lawmman kan dawnna, District Beautification Competition-a pathumna kan ni hi a lawmawm hle a. Serchhip khawpui cheimawi tura hma kan lakna a ni bawk si a, a chhinchhiahtlak hle mai. He lawmman kan dawn theihna tura mawhphurtute zawng zawng chungah lawmthu ka sawi a. Ka lawmna tizualtu chu DC hova department hrang hrangvte, Town Planning Committee te, Florist Association te, NGOs te leh pawl hrang hrangten lungrual taka in thawhhona rah a ni hi a ni, a ti.

Serchhip hi khawpui mawi takah a la chantir theih a, nasa takin a la siam theih tih a chiang a. Nakina a than chhoh zelna tur mual te hi a lang reng a ni. Chung ram te chu mumal taka enkawl ni se, lane kawng kalna tur te pawh, tunah su su kan lai thei nghal lo a nih pawhin, mumal takin lo duang sa ila, mipuite pawhin chu chu zah ila, kawng dik kan zawh tihna a ni mai.

Midang chenna tur khawpui din pawh kan ni lo va, keimahni leh kan tu leh fate la chen zelna tur khua kan din chho mek a ni zawk. Khawpui mawi leh nuam a nih theihna tura hmalak kha kan tih ngei ngei tur thil a ni, tiin mipuite chu khawpui mawi din tuma theihtawp chhuah turin a sawm.

Chief Minister hian Serchhip khawpui cheimawina leh tihhmasawnna an thawh chhoh turah MLA fund atangin Public Water Drinking point siamna tur Rs. 5 lakh a pe a, mipuite mamawhna a nasat tawh avangin a building thar tur la peih lo mah se Serchhip Hospital tan Dialysis khawl ngaihtuah a nih tur thu a sawi bawk.

Inkhawm hi Pu Lalrinzuala, Addl. DC in a kaihruai a, Pu Paul L. Khuma, DC chuan khawpui mawi leh mumal zawk neih a tulzia leh an project duan a hlawhtlin huna Serchhip awm dan tur an hmathlirte a tarlang. An hmalakna turah mipuite thawhpuina a ngen bawk.

Dr. Marilyn Lalruatkimi, SDC chuan intihsiaknaa an hmachhawn dan leh an project chungchang sawifiahna a nei a, an tum lian tham deuh te chu Park siam, kawngsira Palm Trees mumal taka phuna khaw hmelhmang siamthat, Bazar lun lai thawm that; bench te, wall painting te, fountain-te leh signage mawi tak tak te dah. Aizawl Smart City-a an tih anga ATM Water Vending Machine (Public Water Point) dah te, Bypass area-a Truck Bay siam, mumal taka Zebra Crossing siam leh mipui rilrua khaw chhung faina leh mawina tura mawhphurhna tuh (community participation) te a ni.

Inkhawm hi Pu Gaston Vanlalhriatpuia, DUDO chuan lawmthu sawiin a khar a ni.