Nimin chawhnu khan Chief Minister Pu Lal Thanhawla chuan Serchhip Zawlpui Mat kama nula siam kuthnathawktute intelkhawm pawl Serchhip Agriculture & Horticulture Farmers Co-operative Society ten a an inhman tawm tur Tractor 2, Tata Trusts hnuaia North East Initiative Development Agency (NEIDA) hmalaknaa kuthnathawktute tana an ruahman chu kuthnathawktute a hlan. Tractor hlanna programme hi Horticulture Minister Pu PC Lalthanliana'n a kaihhruai a, Parliamentary Secretary Pu K. Lalrinthanga bakah Horticulture Department officer te, kuthnathawktute leh mi pawimawh dangte an tel a ni.

Chief Minister Pu Lal Thanhawla chuan Mat kam leh Serchhip Zawlpui a kuthnathawktuten an thawhrimna avanga hlawhtlinna an hmu chho mek chu a lawmpui thusawiin khawl an dawn thar hmang hian nasa leh zawka an hlawhtlinna a pun leh malsawmna an dawn belh a beisei tih a sawi a. Thlai a bik takin chawhmehah Mizoram chawm thei khawpa in awm hi a lawmawm a nasa leh zawka hma la turin ka chah duh cheu a tiin Mizote chu intihhmuh hnam kan ni a, kuthnatawh leh lonei lam kan intih hmuh hi a pawimawh hle a ni, a ti bawk.

Thawhrimna leh taimakna pawimawh thusawiin sum hi a zawna zawn hmuh tur nilovin a thawha thawh chhuah tur a ni a, Ringtu Zofate te hi mahni kut kea kan thawhchhuaha kan intodelh a pawimawh a, hetia kan thawh hian min Kotu kan ti ropuiin kan chawimawi a ni, a ti a. Ram leilung faten neitu nihna leh mawhpurna inchen vek an neih thusawiin kan zavaiin a chhe lai siam tha tura koh kan ni tih hi kan hriat leh kan pawm a tul a ni, a ti a. Eng hna pawh thawk ila, rinawmna, dikna, taimakna leh Pathian tihna nung nen kan thawh a tul a, hetia hma kan lak chuan Pathian malsawmna nasa zawk kan dawng thei ang a, dikna leh takna nen kan thawh chuan Pathian thinurna nilovin a malsawmna kan tawng bua ang a ti.

Chief Minister chuan NLUP hlawhtlinna chu Pathian lam tang programme anih vang tih sawiin hlawtlinna ziktluak erawh a dawngtu te kutah a innghat a ni, a ti. Kum 20 chhung ram buai avangin eizawnna kawngah mi tam zawkten lei rem an rap lova, chungte hriain hun hmasa lam NLUP hmangin rahbi tleu tawh te rahbi tuksak an ni a, mi rethei inchung rangva neilo te tan inchung rangva te sem a ni a, khang te, a dik tak dawng te kha mi hlawhtling an ni tawh a, chutiang ni turin tunah NLUP dawng mek leh dawng tawh te leh Sawrkar hamthatna leh duhsakna hrang hrang dawng mekte hi chah duh cheu ni, a ti. Tharchhuah chungchang sawiin hlawk leh hlawhtling zawk turin kan tharchhuah te hi kan tih puna kan neih tam a tul a, hemi atan theihtawp kan chhuah tlan a ngai a ni, a thei ang angin hma kan la mek a ni, a ti.

New Economic Development Programme (NEDP) chungchang sawiin NEDP hi NLUP chhunzawmna a ni a, NEDP hi huamzau taka Mizoram leh mipui mamawh ngaihtuah chunga duanchhuah a ni a, Zokhaw lama mamawh hrang hrang te phuhru beisei a ni a, nakum sawrkar kum atana sum tam zawk ruahman tum a nih tih a sawi a. NEDP hnuaia Chief Minister’s Rural Housing Scheme chu a thawhkhatna atana Siaha, Lawngtlai leh Serchhip District ah te hman turin buatsaih mek anih thusawiin mi harsa ten an in leh lo tha zawk an din theihna atan cheng 50,000 zelin in tanpui an ni dawn a, a ti.

Pu PC Lalthanliana chuan helai hmuna kuthnathawktute ten an hnathawh tih awlsam nan tractor 2 an nei chu a lawmpui thusawiin anni tan ni chhinchhiah tlak leh ni ropui a ni a ti a. Hemi hmang hian hlawhtlinna tam zawk an neih a beisei tih sawiin kharchawng avangin kuthnathawktuten an hlawkna tura ang an tel lova, society leh market inzawm tha tak neih in hlawkna tam zawk kuthnathawktute kutah a lut thei tiin hetiang ngaihtuahna hmanga hma la tur in kuthnathawktute a chah a. Society member te chu kalphung felfai tak nei chunga kal turin a chah bawk a ni.

Pu K.Lalrinthanga pawhin thusawiin tractor te chu thawhhona tha tak nei chungin society member ten tangkai taka hmang turin a chah a. Hlawk zawk turin tharchhuah tam a pawimawh thusawiin an hmun hma leh huan te chu hlawk zawka tharchhuah tihpun nan mithiamte rawn chunga hma la turin kuthnathawktute a fuih bawk a ni.

Horticulture Department Director Pu R. Zotawna; Programme Coordinator, NEIDA Tata Trusts Pu Lalrinkima leh kuthnathawktute aiawh atangin Chairman, Serchhip Agriculture & Horticulture Farmers Co-operative Society Pu PC Siamliana te pawhin thu an sawi a. Secretary, Horticulture Department Pu B. Lalhmingthanga'n lawmthu sawiin hun a khar a ni.

He hunah hian Chief Minister in Horticulture Department buatsaih 'A Glimpse of Mizoram Horticulture Department 2016' tih lehkhabu a tlangzarh nghal a ni.

Tractor 2 hi Tata Trusts hnuaia awm North East Initiative Development Agency(NEIDA) te pek a ni a. Tractor pahnih hi nuai 20 man vel niin lei lehna pahnih - rotovator leh cultivator awmin tharchhuah phurna tur trailer a chhawm tel bawk a.NEIDA leh Horticulture Department hian kumin July ni 28 khan thawhhona thuthlung an lo ziak tawh a. Chumi ang chuan District pathum - Aizawl, Lunglei leh Serchhip ah te serthlum, purun sen, zikhlum leh balhla chingtu leh kuthnathawktute te hma lak puiin kawng hrang hrangin Department nen tang hovin an tanpui dawn a ni. Hemi atan hian cheng nuai 150 ruahman niin hmalakna neih choh mek a ni.

NEIDA hian kum 5 chhungin Mizoram ah cheng vaibelchhe 18 sengin kawng hrang hrangin hnathawh an tum a ni.

Nimin vek khan helai biala huan leh loneitu tena an hmang tangkai mek Mat Lui a Chawm Kai a leidawh suspension bridge a hmun kalin Chief Minister leh mi pawimawh dangte hian a en a, he lei thawmthat dan hi a hmuna an en hnuin an sawi a, kuthnathawktute leh loneitu te tan he lei hi a pawimawh em avangin ruahmanna tha tak siam dan a hmuna an sawi nghal a, ruahmanna siam beisei a ni.