Chief Minister Pu Lal Thanhawla chuan vawiin tlai khan Serchhip Press Club lungphum a phum. Chief Minister hi Cooperation Minister Pi Vanlalawmpuii Chawngthu chuan a tawiawm a ni.

Serchhip Press Club lungphum phum tak chu sak thuai a nih nan theih ang anga tan lak tlan a nih tur thu leh hmunhma tha tak nei thei tura hmalatute chungah Chief Minister chuan Press Club lungphum phum puala CMO Conference Hall-a inkhawm buatsaihah lawmthu a sawi a. Chief Minister chuan Mizorama thuthar thehdarhtute inthlunkhawmna pawl Mizoram Journalist Association din a nih chhoh dan sawiin, baihvai taka rambuai karah sawrkar sawiselna lam chhuah avanga man mai hlauhawm dinhmun a dinga hun khirh an tawn hnu ah tunah chuan zalenna zau tak neia "freedom of speech" hmang tangkaiin, ram leh hnam tan hna pawimawh thawk a, circulation zau zawk leh technology changkang tak tak hmang tangkai a hna an thawk ta chu lawmawm a tih thu a sawi a. Chutihrual chuan changkan belh zelna tur awmin, news quality-ah te, thu dik chhuah kawngah leh circulation neih belh kawngah te hmasawn zelin, midang aia news content thar zawk leh chipchiar zawk chhiartute leh entute an hlui theih nana taimak kawpin inelna thianghlim nei se a duh thu a sawi a. Chu chu a chhiartu mipuite hlawkna tur zel pawh a ni, a ti.

CM Pu Lal Thanhawla chuan Mizoram journalist ten sawrkar nen inlaichinna tha tak an nei a sawrkar hmalakna tha taka an tawiawm thin chu lawmawm a ti a. Thuthar thehdarhtuten zalenna an neih chu an hman thiam poh leh mipui tan a tangkai thu a sawi. Mipuite thudik hrilh a, an hriatna kawng hrang hranga tiphuisuitu, sawrkar hmalakna tha taka tlangzarh a, a thalo lai pawh huaisen taka sawrkar khalh ngil thei tura chhuah chu an tih tur a nih thu sawiin, ram leh hnam tana hna pawimawh tak an thawh chu nih thu a sawi a ni. Mipui lawm zawng leh duh zawng chauh nilova, mipui mamawh leh ngaihtuahna a dik zawnga kaihruai thei tura thudik ngaihven thin turin a chah a; circulation tam duh avanga thudik chanve chauh puan emaw, mipui ti chi ai thei thil chhuah te ching lovin, principle tha tak nei turin journalist-te chu a fuih a ni.

MJA Gen. Hqrs. aiawhin Pu Zonunsanga Khiangte, President chuan thu sawiin, Serchhip District MJA Press Club lungphum phum a ni chu lawmawm a tih thu leh building pawh sak thuai theih a beisei thu a sawi a. Thuthar thehdarhtute chuan sawrkar thu pawimawhte puandarh bakah a hmalakna hrang hrang mipuiin an hriat chian theih nan puandarh hna an thawh thin bakah, I&PR Department nen thawkhova Sawrkar hmunhma pawimawh te tlawh a nih thin thu te a sawi tel a ni. Pu C. Ramengmawia, MJA Serchhip District President chuan Press Club tur hmun nghet an nei ta chu lawmawm a tih thu leh chumi atana sawrkar, mimal leh pawl anga tha leh ngaihtuahna sengtute zawng zawng chhungah lawmthu a sawi bawk.

Serchhip Press Club lungphum phum inkhawm hi Pu Kapliana Pachuau, Serchhip MJA Vice President chuan a kaihruai a. Press Club sakna tur hmun hi Serchhip Civil Hospital bulah a ni. Vawiin programme-ah hian Serchhip DC Pi Sangchin Chinzah leh Serchhip District Head of Office hrang hrangte bakah khawtlang leh tlawmngai pawl hruaitute an tel a. MJA Gen. Hqrs. hruaituten an telpui bawk a ni.